നായ്ക്കളെ കൊല്ലണമെന്ന് ഒരു ഭാഗത്ത് മുറവിളി, കേരളത്തിലെ മുഴുവൻ നായ്ക്കളെയും ദത്തെടുക്കാമെന്ന വാഗ്ദാനവുമായി യുവാവ്

നാട്ടിൽ തെരുവുനായ്ക്കളുടെ ശല്യം വളരെയധികമാണ്. തെരുവുനായ്ക്കളെ കൊല്ലണമെന്ന ആവശ്യം ഒരു ഭാഗത്ത് ശക്തമാകുമ്പോൾ മറ്റൊരു ഭാഗത്ത് തെരുവുനായ്ക്കളെ സംരക്ഷിക്കണമെന്നാണ് ഒരു വിഭാഗം ആളുകൾ മുറവിളി കൂട്ടുകയാണ്. അത്തരം ആവശ്യം സോഷ്യൽ മീഡിയയിൽ ഉയർത്തുന്നവരോട് എങ്കിൽ നിങ്ങൾ ഈ നായ്ക്കളെ വീട്ടിൽ കൊണ്ടുപോയി സംരക്ഷിക്കൂ എന്നാണ് സോഷ്യൽ മീഡിയ സമൂഹം ആവശ്യപ്പെടുന്നത്. ഏതായാലും തെരുവുനായ്ക്കളെയെല്ലാം കൊണ്ടുപോയി സംരക്ഷിക്കാൻ തയ്യാറാണെന്ന് അറിയിച്ചിരിക്കുകയാണ് അശ്വന്ത് കോക്ക് എന്ന വ്യക്തി.

സിനിമാ റിവ്യൂ അവതരിപ്പിച്ച് സോഷ്യൽമീഡിയയിൽ സജീവമാണ് അശ്വന്ത് കോക്ക്. കേരളത്തിലെ മുഴുവൻ തെരുവു നായ്ക്കളെയും ദത്തെടുക്കുമെന്നാണ് അശ്വന്ത് കോക്ക് അറിയിച്ചിരിക്കുന്നത്. ‘കേരളത്തിലെ മുഴുവൻ നായ്ക്കളെയും അശ്വന്ത് കോക്ക് ദത്തെടുക്കും’ – എന്നാണ് സോഷ്യൽ മീഡിയയിൽ അശ്വന്ത് കോക്ക് കുറിച്ചത്. അതേസമയം, അശ്വന്ത് ഇങ്ങനെ പറഞ്ഞത് കാര്യമായിട്ടാണോ അതോ സർക്കാസം ആണോ എന്ന സംശയത്തിലാണ് മലയാളികൾ. എന്തൊക്കെയാണെങ്കിലും തെരുവു നായ വിഷയത്തിൽ ഉടൻ തന്നെ ഒരു ശാശ്വത പരിഹാരം വേണമെന്നാണ് മലയാളികൾ ആവശ്യപ്പെടുന്നത്.

ഒമർ ലുലു സംവിധാനം ചെയ്ത ചങ്ക്സ് എന്ന സിനിമയിലൂടെയാണ് അശ്വന്ത് കോക്ക് ശ്രദ്ധിക്കപ്പെടുന്നത്. ചങ്ക്സ് സിനിമയിൽ ഒരു സുപ്രധാന കഥാപാത്രത്തെ അശ്വന്ത് കോക്ക് അവതരിപ്പിച്ചിരുന്നു. ഫേസ്ബുക്കിൽ ഏറെ കോളിളക്കം സൃഷ്ടിച്ച ഫാൻ ഫൈറ്റ് ക്ലബ് എന്ന ഗ്രൂപ്പ് അശ്വന്തിന്റെ ആശയം ആയിരുന്നു. സിനിമ റിവ്യൂകളിലൂടെ ഏറെ ശ്രദ്ധനേടിയ വ്യക്തി കൂടിയാണ് അശ്വന്ത്.