ആക്രമിക്കപ്പെട്ട നടി എന്റെ ചങ്ക്, അവരെ അധിക്ഷേപിച്ചിട്ടില്ല;ആരോപണത്തിൽ വിശദീകരണവുമായി നടൻ ബാബുരാജ്

ആക്രമിക്കപ്പെട്ട നടിയെ അപമാനിച്ചു സംസാരിച്ചിട്ടില്ലെന്നും നടിമാരുടെ കൂട്ടായ്മയായ ഡബ്ല്യുസിസി പ്രത്യേക അജണ്ടയുമായി പ്രവര്‍ത്തിക്കുകയാണെന്നും നടന്‍ ബാബുരാജ് ആരോപിച്ചു.

ബാബുരാജിനെതിരേ ഇന്നലെ നിശിതവിമര്‍ശനവുമായി ഡബ്ല്യുസിസി അംഗങ്ങള്‍ രംഗത്തുന്നിരുന്നു. ഇതിനു മറുപടിയായിട്ടാണ് അദ്ദേഹം പത്രസമ്മേളനത്തില്‍ സംസാരിച്ചത്.

താന്‍ ആക്രമിപ്പിക്കപ്പെട്ട നടിയെ അപമാനിച്ചിട്ടില്ല. അവരുടെ അവസ്ഥയെ കുറിച്ചാണ് ഞാന്‍ പറഞ്ഞത്. ചൂടുവെളളത്തില്‍ വീണ പൂച്ച പച്ചവെളളം കണ്ടാലും പേടിക്കും എന്ന് പറഞ്ഞത് ഒരു പഴഞ്ചൊല്ലാണ്. അര്‍ത്ഥമറിയാത്തിനാല്‍ പാര്‍വതി അത് തെറ്റിദ്ധരിച്ചതാകാമെന്നും ബാബുരാജ് മാധ്യമങ്ങളോട് പറഞ്ഞു.

‘ആക്രമിക്കപ്പെട്ട കുട്ടി എന്റെ ചങ്കാണ്. ആ കുട്ടിക്ക് നീതി കിട്ടാന്‍ ഏതറ്റം വരെയും പോകാന്‍ തയാറാണ്. ആക്രമിക്കപ്പെട്ട നടിയക്കു വേണ്ടിയല്ല ഡബ്ല്യുസിസിയുടെ നീക്കങ്ങള്‍. ഡബ്‌ള്യുസിസിയ്ക്കു പിന്നില്‍ അജണ്ടയുണ്ട്. ഞങ്ങളെ ഇരയായ ആ കുട്ടിയില്‍ നിന്ന് അകറ്റുകയാണ്. വോയ്‌സ് ക്ലിപ്പുകള്‍ ഞങ്ങളുടെ കയ്യിലും ഉണ്ട്. അതൊന്നും പുറത്തുവിട്ട് സംഘടന വലുതാക്കാന്‍ ഞങ്ങളില്ലെന്നും താനും സംഘടനയുടെ കയ്പും മധുരവും അനുഭവിച്ചറിഞ്ഞവനാണെന്നും’ ബാബുരാജ് പറഞ്ഞു.

വനിതാ സംഘടനയില്‍ ഉള്ളവരെ മോഹന്‍ലാല്‍ നടിമാര്‍ എന്ന് വിശേഷിപ്പിച്ചതില്‍ തെറ്റില്ല.

എന്റെ ഭാര്യയും നടിയാണ്. നടിയെ നടിയെന്നല്ലാതെ എന്തു വിളിക്കും. വക്കീലിനെ വക്കീലെന്നല്ലേ വിളിക്കാനാവൂ. അതുപോലെ തന്നെ.

ത്യാഗം സഹിച്ച്‌ പ്രവര്‍ത്തിക്കുന്ന സംഘടനയാണ് അമ്മ. ഡബ്ല്യുസിസി ഉന്നയിച്ചിരിക്കുന്ന ആരോപണത്തോട് അമ്മ പ്രതികരിക്കുമെന്നും എഎംഎംഎ എക്‌സിക്യൂട്ടീവ് അംഗം കൂടിയായ ബാബുരാജ് പറഞ്ഞു.