കഴിഞ്ഞ ജന്മത്തിൽ ഞാൻ എന്തോ നല്ല കാര്യം ചെയ്തിട്ടുണ്ട്, അതായിരിക്കാം ഈ സ്നേഹത്തിന് കാരണം;പിറന്നാൾ ആശംസകൾ നേർന്നവർക്ക് നന്ദി അറിയിച്ച് ഭാവന

നമ്മൾ എന്ന ചിത്രത്തിലൂടെ അഭിനയരംഗത്തേക്ക് കടന്നുവന്ന് പിന്നീട് നായികയായി മാറിയ താരമാണ് ഭാവന. മലയാളത്തിൽ നിന്നും അന്യഭാഷയിലേക്ക് എത്തിയപ്പോൾ താരത്തിനു ലഭിച്ചത് മികച്ച സ്വീകാര്യതയാണ്. നിര്‍മ്മാതാവായ നവീനെ വിവാഹം ചെയ്തതോടെയാണ് താരം കര്‍ണ്ണാടകയുടെ മരുമകളായി മാറിയത്. വിവാഹത്തോടെ ബെംഗലുരുവിലേക്ക് മാറുകയായിരുന്നു താരം.

ബെംഗലുരുവില്‍ നിന്ന് തൃശ്ശൂരിലെ വീട്ടിലേക്കെത്തിയ താരം ഹോം ക്വാറന്റൈനില്‍ ആയിരുന്നു. മുത്തങ്ങ അതിര്‍ത്തി വരെ ഭാവനയെ കൊണ്ടുവിട്ടത് ഭർത്താവും പിന്നീട് സഹോദരനും ആയിരുന്നു. പോലീസിന്റെ അകമ്പടിയോടെയാണ് ഭാവന വീട്ടിലേക്കു തിരിച്ചത്. ഭാവന കഴിഞ്ഞ ദിവസം തന്റെ മുപ്പത്തി നാലാമത്തെ പിറന്നാൾ ആഘോഷിച്ചിരുന്നു. മഞ്ജുവാര്യർ ഉൾപ്പെടെ നിരവധി താരങ്ങളാണ് ഭാവനക്ക് പിറന്നാളാശംസകൾ നേർന്നത്.

‘ഞാൻ നിന്നെ ഒരുപാടൊരുപാട് സ്നേഹിക്കുന്നു എന്നും എപ്പോഴും’ എന്നാണ് സമൂഹമാധ്യമത്തിൽ പിറന്നാൾ ആശംസ നേർന്ന് മഞ്ജു കുറിച്ചത്. നടിമാരായ ശിൽപബാല, മൃദുല മുരളി, ഷ‍ഫ്ന, സംവിധായകൻ ലാലിന്റെ മകൾ മോണിക്ക തുടങ്ങിയവരൊക്കെ താരത്തിന് ആശംസകൾ നേർന്നു. ഇവർക്കെല്ലാം നന്ദിപറഞ്ഞുകൊണ്ട് ഭാവന സമൂഹമാധ്യമത്തിൽ എഴുതിയ കുറിപ്പാണ് ഇപ്പോൾ വൈറലാകുന്നത്.

‘മറ്റൊരു വർഷം അതിൻറെ എല്ലാ ഉയർച്ചകളോടും താഴ്ചകളോടും കൂടി കടന്നുപോയി. എല്ലാ കരുതലോടും സ്നേഹത്തോടും കൂടി ഒരു മികച്ച വ്യക്തിയാകാൻ എന്നെ സഹായിച്ചു. എന്റെ തന്നെ ഒരു മികച്ച പതിപ്പിനായി ഒരു പുതുവർഷം ആരംഭിക്കുകയാണ്. എന്റെ ജന്മദിനത്തിൽ ഉഷ്മളവും ആത്മാർത്ഥവുമായ ആശംസകൾ എല്ലാവർക്കും ഞാൻ വളരെയധികം നന്ദി പറയുന്നു.

നിങ്ങളിൽ നിന്ന് നിരുപാധികമായ അത്തരം സ്നേഹം ലഭിക്കുന്നതിന് എന്റെ മുൻ ജീവിതത്തിൽ ഞാൻ വളരെ നല്ല എന്തെങ്കിലും ചെയ്തിട്ടുണ്ടെന്ന് എനിക്ക് ഉറപ്പുണ്ട്.. എല്ലാവർക്കും ഒരുപാട് നന്ദി.. എപ്പോഴും സ്നേഹം..’ ഭാവന തന്റെ ഇൻസ്റ്റാഗ്രാം അക്കൗണ്ടിൽ കുറിച്ചു.