കണ്ടാൽ പേടിച്ചു പോകുന്ന ചിരി, മമ്മൂട്ടിയുടെ പിറന്നാൾ ദിനത്തിൽ ‘ഭ്രമയുഗം’ സിനിമയുടെ സ്പെഷ്യൽ പോസ്റ്ററുമായി അണിയറപ്രവർത്തകർ

മലയാളത്തിന്റെ പ്രിയനടൻ മമ്മൂട്ടിയുടെ പിറന്നാളാണ് ഇന്ന്. പിറന്നാൾ ദിനത്തിൽ താരത്തിനെ ആശംസകൾ കൊണ്ട് മൂടുകയാണ് സഹപ്രവർത്തകരും ആരാധകരും. മമ്മൂട്ടിയുടെ എഴുപത്തിരണ്ടാം ജന്മദിനത്തിൽ അദ്ദേഹത്തിന്റെ ഭ്രമയുഗം സിനിമയുടെ ഫസ്റ്റ് ലുക്ക് പോസ്റ്റർ പുറത്തു വിട്ടിരിക്കുകയാണ് അണിയറപ്രവർത്തകർ. മമ്മൂട്ടി നായകനായി എത്തുന്ന ഭ്രമയുഗം സിനിമ സംവിധാനം ചെയ്യുന്നത് രാഹുൽ സദാശിവനാണ്.

മമ്മൂട്ടിയുടെ പിറന്നാളിനോട് അനുബന്ധിച്ചാണ് ഭ്രമയുഗത്തിന്റെ സ്പെഷ്യൽ പോസ്റ്റർ സംവിധായകൻ രാഹുലും സിനിമയുടെ മറ്റ് അണിയറപ്രവർത്തകരും ചേർന്ന് പുറത്തു വിട്ടത്. ഹാപ്പി ബെർത്ത് ഡേ മമ്മൂക്ക എന്ന ആശംസയോടെയാണ് സോഷ്യൽ മീഡിയയിൽ പോസ്റ്റർ പങ്കുവെച്ചത്. ചിരിച്ചു കൊണ്ടു നിൽക്കുന്ന മമ്മൂട്ടിയാണ് പോസ്റ്ററിൽ ഉള്ളതെങ്കിലും ആ ചിരിയും നോട്ടവും കാണുന്നവരിൽ ഭയം നിറയ്ക്കുന്നതാണ്. ഹൊറർ ചിത്രമായ ഭ്രമയുഗത്തിൽ പ്രതിനായകവേഷത്തിലാണ് മമ്മൂട്ടി എത്തുന്നതെന്നാണ് റിപ്പോർട്ടുകൾ.

ഏതായാലും ഭ്രമയുഗത്തിന്റെ പോസ്റ്റർ നിമിഷനേരം കൊണ്ടു തന്നെ വൈറലായി മാറിയിരിക്കുകയാണ് സോഷ്യൽ മീഡിയയിൽ. അർജുൻ അശോകനാണ് ചിത്രത്തിൽ പ്രധാനവേഷത്തിൽ എത്തുന്ന മറ്റൊരു താരം. ഭൂതകാലം എന്ന സിനിമയ്ക്ക് ശേഷം രാഹുൽ സദാശിവൻ സംവിധാനം ചെയ്യുന്ന ചിത്രമാണ് ഭ്രമയുഗം. അഞ്ച് ഭാഷകളിലായിട്ട് ആയിരിക്കും ചിത്രം റിലീസ് ചെയ്യുക. സിദ്ധാർത്ഥ് ഭരതൻ, അമൽഡ ലിസ് തുടങ്ങിയവരാണ് മറ്റ് പ്രധാനവേഷങ്ങൾ കൈകാര്യം ചെയ്യുന്നത്.