ബിഗ് ബോസ് ജേതാവ് ദിൽഷ നായികയാകുന്നു, ‘ഓ സിൻഡ്രല’യിൽ ദിൽഷയ്ക്കൊപ്പം അനൂപ് മേനോനും അജു വർഗീസും

ബിഗ് ബോസ് സീസൺ നാല് വിജയി ദിൽഷ പ്രസന്നൻ നായികയായി തന്റെ സിനിമ അരങ്ങേറ്റം കുറിക്കുന്നു. ഓ സിൻഡ്രല എന്നാണ് ചിത്രത്തിന്റേ പേര്. അനൂപ് മേനോൻ സ്റ്റോറീസ് അവതരിപ്പിക്കുന്ന ചിത്രത്തിൽ അനൂപ് മേനോൻ ഒരു പ്രധാന വേഷത്തിൽ എത്തുന്നു. മറ്റൊരു പ്രധാന കഥാപാത്രമായി അജു വർഗീസും എത്തുന്നുണ്ട്. സിനിമയുടെ കൂടുതൽ വിശദാംശങ്ങൾ ലഭ്യമായിട്ടില്ല.

അതേസമയം, സിനിമ അരങ്ങേറ്റത്തിന് ഒപ്പം നിന്നവർക്ക് ദിൽഷ തന്റെ സോഷ്യൽ മീഡിയയിലൂടെ നന്ദി അറിയിച്ചു. ‘എന്റെ അരങ്ങേറ്റ ചിത്രം ഓ സിൻഡ്രെല്ല ഇവിടെ പ്രഖ്യാപിക്കുന്നു. ആദ്യമായി എല്ലാ കാര്യത്തിനും ഞാൻ ദൈവത്തോട് നന്ദി പറയുന്നു. ഒപ്പം എന്നെ ഈ ഇൻഡസ്ട്രിയിലേക്ക് സ്വാഗതം ചെയ്തതിന് മഹാദേവൻ തമ്പി ഏട്ടനും നന്ദി. ഈ മനോഹരമായ ഒരു തുടക്കം എനിക്ക് നൽകിയതിനും എന്നെ വിശ്വസിച്ചതിനും എന്നെ നയിക്കുന്നതിനും അനൂപേട്ട നന്ദി. നിങ്ങൾ ഒരു വലിയ മനുഷ്യനാണ്. എല്ലാവർക്കും നന്ദി. നിങ്ങളെല്ലാവരുടെയും പിന്തുണ എനിക്ക് വേണം”, – ഓ സിൻഡ്രലയുടെ പോസ്റ്റർ പങ്കുവെച്ചു കൊണ്ട് ദിൽഷ കുറിച്ചു.

നിരവധി പേരാണ് ദിൽഷയ്ക്ക് അഭിനന്ദനവുമായി എത്തിയത്. ‘നീയത് ചെയ്യുന്നു, വെറും പ്രഖ്യാപനങ്ങളും കുറുക്കുവഴികളുമല്ല. ഇത് കഠിനാദ്ധ്വാനമാണ്. ‘ – ബിഗ് ബോസിൽ ദിൽഷയുടെ സഹമത്സരാർത്ഥി ആയിരുന്ന റിയാസ് സലിം കമന്റ് ബോക്സിൽ കുറിച്ചു. നിരവധി പേരാണ് അഭിനന്ദനങ്ങളുമായി കമന്റ് ബോക്സിൽ എത്തിയിരിക്കുന്നത്. കമന്റ് കുറിച്ചവരിൽ ചിലർ ബിഗ് ബോസിൽ ദിൽഷയുടെ സഹമത്സരാർത്ഥി ആയിരുന്ന റോബിൻ രാധാകൃഷ്ണനെ ട്രോളാനും മറന്നില്ല. ഷോയ്ക്കിടയിൽ റോബിൻ ദിൽഷയോട് പ്രണയാഭ്യർത്ഥന നടത്തിയിരുന്നു. എന്നാൽ ഷോ കഴിഞ്ഞ് പുറത്തിറങ്ങിയ ദിൽഷ റോബിനോട് നോ പറഞ്ഞതിനെ തുടർന്ന് അതികഠിനമായ സൈബർ ആക്രമണം നേരിട്ടിരുന്നു.