‘ഒറ്റക്കൊമ്പ’നില്‍ ബിജു മേനോനും; ചിത്രം പങ്കുവെച്ച് സുരേഷ് ഗോപിയും ടോമിച്ചന്‍ മുളകുപാടവും

സുരേഷ് ഗോപി നായകനായെത്തുന്ന ഒറ്റക്കൊമ്പന്റെ ഭാഗമാകാന്‍ നടന്‍ ബിജുമേനോനും. നിര്‍മ്മാതാവ് ടോമിച്ചന്‍ മുളകുപാടം തന്റെ ഫേസബുക്ക് പേജിലൂടെയാണ് വിവരം അറിയിച്ചിരിക്കുന്നത്. ചിത്രത്തിലെ ബിജുമേനോന്റെ ലുക്കും അദ്ദേഹം പുറത്തുവിട്ടിട്ടുണ്ട്. ചിത്രത്തിന്റെ ഫസ്റ്റ് ലുക്ക് പോസ്റ്ററും ടൈറ്റില്‍ പ്രഖ്യാപനവുമെല്ലാം സൈബറിടങ്ങളില്‍ വലിയ ചര്‍ച്ചയായിരുന്നു.

ബിജു മേനോന്റെ സാന്നിദ്ധ്യം തങ്ങളുടെ പ്രൊജക്ടിനെ കൂടുതല്‍ ചലനാത്മകവും ഉത്സാഹ പൂര്‍ണവുമാക്കുമെന്ന് ടോമിച്ചന്‍ മുളകുപാടം പറഞ്ഞു. സുരേഷ് ഗോപിയും താരത്തെ സ്വാഗതം ചെയ്തിട്ടുണ്ട്. ബിജു മേനോന്‍ ഒറ്റക്കൊമ്പന്റെ ഭാഗമാകുന്നതില്‍ അതീവ സന്തോഷമുണ്ടെന്ന് സുരേഷ് ഗോപി ഫേസ്ബുക്കില്‍ കുറിച്ചു.

25 കോടിയാണ് ചിത്രത്തിന്റെ ബജറ്റ്. ക്യാമറ ഷാജികുമാര്‍. സംഗീത സംവിധാനം: ഹര്‍ഷവര്‍ധന്‍ രാമേശ്വര്‍. ഗാനരചന: അനില്‍ ലാല്‍. മുകേഷ്, വിജയരാഘവന്‍, രണ്‍ജി പണിക്കര്‍, ജോണി ആന്റണി, സുധി കോപ്പ, കെപിഎസി ലളിത എന്നിവരും ചിത്രത്തിലുണ്ടാവും. നായികയും വില്ലനും ബോളിവുഡില്‍ നിന്നായിയിരിക്കും. സുരേഷ് ഗോപിയുടെ കരിയറിലെ ഏറ്റവും വലിയ ചിത്രം എന്നാണ് അണിയറക്കാര്‍ അവകാശപ്പെടുന്നത്. 250-ാമത് സുരേഷ് ഗോപി ചിത്രമെന്ന രീതിയില്‍ നേരത്തെ സിനിമയുടെ ടീസര്‍ പുറത്തിറങ്ങി വലിയ ഹിറ്റായിരുന്നു. തുടര്‍ന്ന് ഷാജി കൈലാസിന്റെ പൃഥ്വിരാജ് ചിത്രമായ കടുവയുമായി സാമ്യമുണ്ടെന്ന ആരോപണത്തെ തുടര്‍ന്ന് ചിത്രം കോടതി കയറിയിരുന്നു.