‘നിന്നെപ്പോലൊരു മോള്‍ എനിക്കുമുണ്ട്’, നിറകണ്ണുകളോടെ ബിനു അടിമാലി

മലയാളി പ്രേക്ഷകരുടെ പ്രിയ താരമാണ് ബിനു അടിമാലി. മിമിക്രിയില്‍ നിന്നുമാണ് താരം സിനിമ ലോകത്തേക്ക് എത്തിയത്. സിനിമയിലും ചാനല്‍പരിപാടികളിലുമെല്ലാമായി സജീവമാണ് താരം. ആദ്യ ചിത്രം തല്‍സമയം ഒരു പെണ്‍കുട്ടിയാണ്. തുടര്‍ന്ന് ഇതിഹാസ, പാവാട, പത്തേമാരി, കിങ് ലയര്‍, ജോര്‍ജേട്ടന്‍സ് പൂരം, കാര്‍ബണ്‍ തുടങ്ങി അമ്പതോളം സിനിമകളില്‍ ബിനു അഭിനയിച്ചിട്ടുണ്ട്.

ഇപ്പോള്‍ സ്റ്റാര്‍ മാജിക്കിലും സജീവമാണ് അദ്ദേഹം. ഡൗണ്‍ സിന്‍ഡ്രോം ബാധിച്ച സന മോള്‍ അടുത്തിടെ സ്റ്റാര്‍ മാജിക്കിലേക്ക് അതിഥിയായി എത്തിയിരുന്നു. ലക്ഷ്മി നക്ഷത്രയുടെ വീഡിയോയിലൂടെ പ്രേക്ഷകര്‍ക്ക് സുപരിചിതയാണ് സനമോള്‍. സ്റ്റാര്‍ മാജിക് എന്ന പരിപാടി സനമോളുടെ ജീവിതത്തിലുണ്ടാക്കിയ മാറ്റത്തെക്കുറിച്ച് ലക്ഷ്മിയും സനയുടെ അമ്മയും പറഞ്ഞിരുന്നു. നിറഞ്ഞ സ്നേഹത്തോടെയായിരുന്നു താരങ്ങളെല്ലാം സനയേയും കുടുംബത്തേയും വേദിയിലേക്ക് ക്ഷണിച്ചത്. അതേ സമയം തന്റെ മകളെക്കുറിച്ച് പറഞ്ഞ് ബിനു അടിമാലി വികാരഭരിതനായി. നിന്നെപ്പോലൊരു മോള്‍ എനിക്കുമുണ്ട്, ഭാര്യ വിളിക്കുന്നതിനേക്കാളും കൂടുതല്‍ എന്നെ വിളിച്ച് കാര്യങ്ങള്‍ തിരക്കുന്നത് അവളാണ്, ഇപ്പോഴും എന്റെ കൂടെയാണ് അവള്‍ കിടക്കുന്നത്. ബിനു അടിമാലി നിറഞ്ഞ കണ്ണുകളോടെയാണ് മകളെക്കുറിച്ച് പറഞ്ഞത്.

തന്റെ മകള്‍ക്ക് ആരുടേയും സഹതാപം വേണ്ടെന്നായിരുന്നു സനയുടെ അമ്മ പറഞ്ഞത്. എനിക്ക് ഇങ്ങനെയൊരു മോള്‍ ഉള്ളതിനാല്‍ ഞങ്ങളുടെ കൂടപ്പിറപ്പാണ് എന്ന് പറയാന്‍ നാണക്കേടുണ്ടെന്ന് കസിന്‍സ് വരെ എന്നോട് പറഞ്ഞിട്ടുണ്ട്. അന്ന് വല്ലാതെ വേദനിച്ചെങ്കിലും ഇന്ന് ആ മകളുടെ പേരില്‍ അറിയപ്പെടാന്‍ കഴിയുന്നതില്‍ അഭിമാനം തോന്നുന്നുവെന്നും സനയുടെ അമ്മ പറഞ്ഞു.