‘ക്രോമയില്‍ ഷൂട്ട് ചെയ്യാനാണ് തീരുമാനിച്ചത്, അത് നിരസിച്ചു’; കെജിഎഫിലെ കടുപ്പമേറിയ സംഘട്ടനത്തെക്കുറിച്ച് സഞ്ജയ് ദത്ത്

പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ് കെജിഎഫ് ചാപ്റ്റര്‍ 2. ഏപ്രില്‍ പതിനാലിനാണ് ചിത്രം തീയറ്ററുകളിലെത്തുക. ചിത്രത്തിലെ പ്രധാനകഥാപാത്രങ്ങളില്‍ ഒന്ന് ബോളിവുഡ് താരം സഞ്ജയ് ദത്താണ് അവതരിപ്പിച്ചിരിക്കുന്നത്. അര്‍ബുദരോഗത്തില്‍ നിന്ന് മുക്തനായശേഷം സഞ്ജയ് ദത്ത് ആദ്യമായി അഭിനയിച്ച ചിത്രമായിരുന്നു കെജിഎഫ് 2. ഇപ്പോഴിതാ ചിത്രത്തിലെ അപകടമേറിയ സംഘട്ടനത്തെക്കുറിച്ച് വെളിപ്പെടുത്തിയിരിക്കുകയാണ് സഞ്ജയ് ദത്ത്.

രോഗം ഭേദമായി ഉടന്‍ ചെയ്ത ചിത്രമായതിനാല്‍ അണിയറപ്രവര്‍ത്തകര്‍ തന്റെ ആരോഗ്യത്തില്‍ ഏറെ ശ്രദ്ധപുലര്‍ത്തിയിരുന്നു. സെറ്റില്‍ ചെളിയും പുകയും പൊടിയുമെല്ലാം ഉണ്ടായിരുന്നു. തന്റെ ആരോഗ്യം സംരക്ഷിക്കാനുള്ളതെല്ലാം അവര്‍ ചെയ്തിരുന്നു. ചിത്രത്തിലെ ഒരു പ്രധാന സംഘട്ടനരംഗം ക്രോമയില്‍ ഷൂട്ട് ചെയ്യാനായിരുന്നു തീരുമാനിച്ചിരുന്നത്. എന്നാല്‍ അത് താന്‍ നിരസിച്ചു. സിനിമ നന്നായി ചിത്രീകരിക്കണമെന്നത് നടനെന്ന നിലയില്‍ തന്റെ ആവശ്യമാണ്. അവരുടെ സഹായമില്ലായിരുന്നെങ്കില്‍ താനത് ചെയ്യുമായിരുന്നില്ലെന്നും സഞ്ജയ് ദത്ത് പറഞ്ഞു.

സഞ്ജയ് ദത്തിന്റെ ആരോഗ്യത്തെക്കുറിച്ചോര്‍ത്ത് തനിക്ക് ഭയമുണ്ടായിരുന്നുവെന്ന് നായകനായ യഷ് ഈയിടെ പറഞ്ഞിരുന്നു. സഞ്ജു സാര്‍ ഒരു പോരാളിയാണെന്നും ഈ സിനിമയെ മറ്റൊരു തലത്തിലേക്ക് എത്തിയച്ചത് അദ്ദേഹത്തിന്റെ സാന്നിധ്യമാണെന്നും യാഷ് പറഞ്ഞിരുന്നു. പ്രശാന്ത് നീല്‍ തന്നെയാണ് കെജിഎഫ് 2ഉം സംവിധാനം ചെയ്തിരിക്കുന്നത്. യാഷിനും സഞ്ജയ് ജത്തിനും പുറമേ പ്രകാശ് രാജ്, രവീണ ടാന്‍ഡന്‍, ശ്രീനിഥി ഷെട്ടി തുടങ്ങി വന്‍ താരനിരയാണ് രണ്ടാം ഭാഗത്തില്‍ അണിനിരക്കുന്നത്. മലയാളം, ഹിന്ദി, തമിഴ്, കന്നഡ, തെലുങ്ക് ഉള്‍പ്പെടെയുള്ള ഭാഷകളിലാകും ചിത്രത്തിന്റെ റിലീസ്.