‘വോട്ടവകാശമുള്ള ആർക്കും അപേക്ഷിക്കാം’; രതീഷ് ബാലകൃഷ്ണൻ പൊതുവാളിന്റെ പുതിയ ചിത്രത്തിലേക്ക് അഭിനേതാക്കളെ തേടുന്നു

തിയറ്ററുകൾ ഇളക്കിമറിച്ച ‘ന്നാ താൻ കേസ് കൊട്’ എന്ന ചിത്രത്തിനു ശേഷം രതീഷ് ബാലകൃഷ്ണൻ പൊതുവാൾ തിരക്കഥ ഒരുക്കുന്ന ചിത്രത്തിലേക്ക് അഭിനേതാക്കളെ ക്ഷണിക്കുന്നു. ‘വോട്ടവകാശമുള്ള ആർക്കും അപേക്ഷിക്കാം’ എന്ന ടാഗ് ലൈനോടെയാണ് കാസ്റ്റിംഗ് കോൾ പോസ്റ്റർ അണിയറപ്രവർത്തകർ പുറത്തിറക്കിയിരിക്കുന്നത്. ഇതിനു മുൻപ് അഭിനയിച്ചിട്ടില്ലാത്തവർക്കാണ് മുൻഗണനയെന്നും അണിയറപ്രവർത്തകർ വ്യക്തമാക്കുന്നു. സുധീഷ് ഗോപിനാഥ് ആണ് ചിത്രം സംവിധാനം ചെയ്യുന്നത്.

രതീഷ് ബാലകൃഷ്ണ പൊതുവാൾ തിരക്കഥ ഒരുക്കുന്ന ചിത്രം നിർമിക്കുന്നത് അജിത്ത് വിനായകനാണ്. സിനിമയിൽ അഭിനയിക്കാൻ താൽപര്യമുള്ളവർ ഒരു ഫോട്ടോയും വീഡിയോയും അയയ്ക്കാനാണ് അണിയറപ്രവർത്തകർ ആവശ്യപ്പെട്ടിരിക്കുന്നത്. 70122 52714 എന്ന വാട്സാപ്പ് നമ്പറിലേക്കാണ് ഫോട്ടോയും വീഡിയോയും അയയ്ക്കേണ്ടത്. വിവേക് ഹർഷനാണ് ചിത്രത്തിന്റെ എഡിറ്റിംഗ്. ഷഹനാദ് ജലാൽ ആണ് ഛായാഗ്രഹണം. സൗണ്ട് ഡിസൈൻ നിർവഹിക്കുന്നത് ശ്രീജിത്ത് ശ്രീനിവാസൻ ആണ്.

കുഞ്ചാക്കോ ബോബൻ നായകനായി എത്തിയ ‘ന്നാ താൻ കേസ് കൊട്’ തിരക്കഥ എഴുതി സംവിധാനം ചെയ്തത് രതീഷ് ബാലകൃഷ്ണൻ പൊതുവാൾ ആണ്. തിയറ്ററുകളിൽ മികച്ച പ്രതികരണങ്ങൾ സ്വന്തമാക്കി ചിത്രം പ്രദർശനം തുടരുകയാണ്. ചിത്രം 50 കോടി ക്ലബിൽ ഇടം നേടിക്കഴിഞ്ഞു. റോഡിലെ കുഴികൾ നാട്ടിൽ സജീവ ചർച്ചയായിരുന്ന സമയത്ത് ആയിരുന്നു ചിത്രം റിലീസ് ചെയ്തത്. റിലീസ് ദിവസം നൽകിയ പത്രപ്പരസ്യം വിവാദമാകുകയും പിന്നീട് വലിയരീതിയിൽ ആളുകൾ തിയറ്ററുകളിലേക്ക് എത്തുകയും ചെയ്തു.