സിനിമയിൽ അരങ്ങേറ്റം കുറിച്ച് ചെമ്പൻ വിനോദിന്റെ ഭാര്യ; ക്യാരക്ടർ പോസ്റ്റർ പങ്കുവെച്ച് താരം

നടനും നിർമാതാവുമായ ചെമ്പൻ വിനോദ് ജോസിന്റെ ഭാര്യ മറിയവും സിനിമയിലേക്ക്. ചെമ്പൻ വിനോദ് ജോസ് തിരക്കഥയെഴുതുന്ന ‘ഭീമന്റെ വഴി’ എന്ന ചിത്രത്തിലാണ് മറിയം അഭിനയിക്കുന്നത്. ചിത്രത്തിൽ കുഞ്ചാക്കോ ബോബനും ചെമ്പൻ വിനോദുമാണ് കേന്ദ്രകഥാപാത്രങ്ങളായി എത്തുന്നത്. ചിത്രത്തിൽ ഒരു നഴ്സിന്റെ കഥാപാത്രമായാണ് മറിയം എത്തുന്നത്.

സോഷ്യൽ മീഡിയയിൽ മറിയത്തിന്റെ ക്യാരക്ടർ പോസ്റ്റർ പങ്കുവെച്ചിട്ടുണ്ട്. അടുത്തിടെ പുറത്തിറങ്ങിയ ട്രയിലറിലും മറിയം പ്രത്യക്ഷപ്പെട്ടിരുന്നു. കുഞ്ചാക്കോ ബോബനെ നായകനാക്കി അഷ്റഫ് ഹംസ സംവിധാനം ചെയ്യുന്ന ചിത്രമാണ് ‘ഭീമന്റെ വഴി’. തമാശ എന്ന ചിത്രത്തിനു ശേഷം അഷ്റഫ് ഹംസ സംവിധാനം ചെയ്യുന്ന ചിത്രമാണിത്. സാധാരണ നാട്ടിൻപുറങ്ങളിലും മറ്റും കാണുന്ന വഴി പ്രശ്നം ആണ് ചിത്രം ചർച്ച ചെയ്യുന്നതെന്ന് ട്രയിലറിൽ കാണാം.

‘അങ്കമാലി ഡയറീസ്’ എന്ന ഹിറ്റ് ചിത്രത്തിന് ശേഷം ചെമ്പൻ വിനോദ് ജോസ് തിരക്കഥ രചിക്കുന്ന ചിത്രമാണ് ഭീമന്റെ വഴി. ചിത്രത്തിൽ ഒരു പ്രധാന കഥാപാത്രത്തെയും ചെമ്പൻ ജോസ് വിനോദ് അവതരിപ്പിക്കുന്നുണ്ട്. കുഞ്ചാക്കോ ബോബൻ, ചിന്നു ചാന്ദ്നി, മേഘ തോമസ്, വിൻസ് അലോഷ്യസ്, ശബരീഷ് വർമ, നിർമൽ പാലാഴി, ബിനു പപ്പു, ദിവ്യ എം നായർ, ഭഗത് മാനുവൽ, ആര്യ സലീ തുടങ്ങിയവരാണ് ചിത്രത്തിൽ പ്രധാന വേഷത്തിൽ എത്തുന്നത്. സുരാജ് വെഞ്ഞാറമൂട് ചിത്രത്തിൽ അതിഥി വേഷത്തിൽ എത്തുന്നുണ്ട്.

ചെമ്പൻ വിനോദിന്റെ ഉടമസ്ഥതയിലുള്ള ചെമ്പോസ്കി മോഷൻ പിക്ചേഴ്സും ആഷിഖ് അബുവിന്റെ ഒപിഎം സിനിമാസും ചേർന്നാണ് നിർമാണം. ഗിരീഷ് ഗംഗാധരൻ ആണ് ഛായാഗ്രഹണം. ഗാനങ്ങൾ – മുഹ്സിൻ പരാരി, സംഗീത സംവിധാനം – വിഷ്ണു വിജയ്, കലാസംവിധാനം – അഖിൽ രാജ് ചിറയിൽ, എഡിറ്റിംഗ് – നിസാം കാദിരി. ഡിസംബർ മൂന്നിന് ചിത്രം തിയറ്ററുകളിൽ റിലീസ് ചെയ്യും. കേരളത്തിൽ 130ഓളം തിയറ്ററുകളിൽ ആയിരിക്കും ‘ഭീമന്റെ വഴി’ പ്രദർശനത്തിനെത്തുകയെന്ന് സിനിമയുമായി ബന്ധപ്പെട്ടവർ അറിയിച്ചു. ചീഫ് അസ്സോസിയേറ്റ് ഡയറക്ടർ – ഹരീഷ് തേക്കേപ്പാട്ട് , സൗണ്ട് ഡിസൈൻ – അരുൺ രാമ വർമ്മ, മേക്കപ്പ് – ആർ.ജി. വയനാടൻ, കോസ്റ്റ്യൂംസ് – മസ്ഹർ ഹംസ, പ്രൊഡക്ഷൻ കൺട്രോളർ – ഡെവിസൺ സി.ജെ., പി.ആർ.ഒ. – ആതിര ദിൽജിത്, സ്റ്റിൽസ് – അർജ്ജുൻ കല്ലിങ്കൽ