ഇടതു കൈ കൊണ്ട് തോക്ക് ചൂണ്ടി മമ്മൂട്ടി, ബി ഉണ്ണിക്കൃഷ്ണൻ – ഉദയ് കൃഷ്ണ കൂട്ടുകെട്ടിൽ ഒന്നിക്കുന്ന ‘ക്രിസ്റ്റഫർ’ പുതിയ പോസ്റ്റർ

മമ്മൂട്ടിയെ നായകനാക്കി സംവിധായകൻ ബി ഉണ്ണിക്കൃഷ്ണൻ ഒരുക്കുന്ന പുതിയ ചിത്രമാണ് ക്രിസ്റ്റഫർ. ഉദയ് കൃഷ്ണ തിരക്കഥ ഒരുക്കുന്ന ചിത്രത്തിന്റെ പുതിയ പോസ്റ്റർ പുറത്തിറക്കി. ആര്‍ ഡി ഇല്യൂമിനേഷന്‍സിന്റെ ബാനറില്‍ ബാനറിലാണ് ഈ ത്രില്ലർ ചിത്രം ഒരുങ്ങുന്നത്. ചിത്രത്തിൽ പൊലീസ് ഓഫീസറുടെ വേഷത്തിലാണ് മമ്മൂട്ടി എത്തുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്ററിനും ലൊക്കേഷൻ വീഡിയോകൾക്കും വൻ വരവേൽപ്പ് ആയിരുന്നു ലഭിച്ചത്.

പ്രഖ്യാപനദിവസം മുതൽ ചിത്രത്തിന്റേതായി പുറത്തുവരുന്ന എല്ലാ വീഡിയോകൾക്കും വലിയ റീച്ച് ആണ് ലഭിക്കുന്നത്. ഇപ്പോൾ ഇറങ്ങിയ പോസ്റ്ററിനും വൻ സ്വീകരണമാണ് ലഭിച്ചിരിക്കുന്നത്. പോസ്റ്ററിൽ തോക്കേന്തി നിൽക്കുന്ന മമ്മൂട്ടിയുടെ നായക കഥാപാത്രത്തെയാണ് കാണാൻ കഴിയുന്നത്. ബയോഗ്രഫി ഓഫ് എ വിജിലന്റ് കോപ്പ് എന്നാണ് ചിത്രത്തിന്റെ ടാഗ് ലൈൻ. സ്നേഹ, അമല പോൾ, ഐശ്വര്യ ലക്ഷ്മി എന്നിങ്ങനെ മൂന്ന് നായികമാരാണ് ചിത്രത്തിലുള്ളത്. പ്രശസ്ത തെന്നിന്ത്യൻ താരം വിനയ് റായ് ആണ് ചിത്രത്തിൽ വില്ലനായി എത്തുന്നത്.

വിനയ് റായ് അഭിനയിക്കുന്ന ആദ്യ മലയാളചിത്രം എന്ന പ്രത്യേകതയും ക്രിസ്റ്റഫറിനുണ്ട്. ഷൈൻ ടോം ചാക്കോ, ദിലീഷ് പോത്തൻ, സിദ്ദിഖ്, ജിനു എബ്രഹാം തുടങ്ങി നിരവധി താരങ്ങളോടൊപ്പം മുപ്പത്തിയഞ്ചോളം പുതുമുഖങ്ങളും സിനിമയിൽ അഭിനയിക്കുന്നുണ്ട്. എറണാകുളം, പൂയംകുട്ടി, വണ്ടിപ്പെരിയാര്‍ എന്നിവിടങ്ങളായിരുന്നു പ്രധാന ലൊക്കേഷനുകള്‍. മമ്മൂട്ടിയെ നായകനാക്കി ബി ഉണ്ണികൃഷ്ണന്‍ ഒരുക്കുന്ന രണ്ടാമത്തെ ചിത്രം ആണിത്. 2010ല്‍ പുറത്തെത്തിയ പ്രമാണിയാണ് ഇരുവരും ഒന്നിച്ച ആദ്യ ചിത്രം. ഫൈസ് സിദ്ദിഖ് ആണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്. ചിത്രത്തിന് സംഗീതം ഒരുക്കുന്നത് ജസ്റ്റിന്‍ വര്‍ഗീസ് ആണ്. എഡിറ്റിംഗ്: മനോജ്, കലാ സംവിധാനം: ഷാജി നടുവില്‍ വസ്ത്രാലങ്കാരം: പ്രവീണ്‍ വര്‍മ്മ, ചമയം: ജിതേഷ് പൊയ്യ, പ്രൊഡക്ഷന്‍ കണ്‍ട്രോളര്‍: അരോമ മോഹന്‍, പി.ആര്‍.ഒ: പി.ശിവപ്രസാദ് & നിയാസ് നൗഷാദ്, മാര്‍ക്കറ്റിംങ്: ഒബ്‌സ്‌ക്യൂറ എന്റര്‍ടൈന്‍മെന്റ്‌സ്, സ്റ്റില്‍സ്: നവീന്‍ മുരളി.