‘ഇനിയൊരു ചാമ്പ്യൻഷിപ്പിൽ അദ്ദേഹത്തിന് ധൈര്യമായി പങ്കെടുക്കാം’: മോഹൻലാലിന് കൈയടിച്ച് ബോക്സിംഗ് കോച്ച്

കഴിഞ്ഞ കുറച്ചു ദിവസങ്ങളായി ബോക്സിംഗ് പരിശീലനം നടത്തുന്ന നടൻ മോഹൻലാൽ ആണ് സോഷ്യൽ മീഡിയയിൽ താരം. ജീത്തു ജോസഫ് സംവിധാനം ചെയ്യുന്ന ട്വൽത് മാനിലാണ് മോഹൻലാൽ ഇപ്പോൾ അഭിനയിക്കുന്നതെങ്കിലും അടുത്ത സിനിമയ്ക്കായുള്ള കടുത്ത പരിശീലനമാണ് ഷൂട്ടിംഗ് ഇടവേളകളിൽ ഇപ്പോൾ നടത്തിക്കൊണ്ടിരിക്കുന്നത്. ട്വൽത് മാൻ കഴിഞ്ഞാൽ പ്രിയദർശൻ സംവിധാനം ചെയ്യുന്ന സ്പോർട്സ് പ്രമേയമായ സിനിമയിലാണ് മോഹൻലാൽ അഭിനയിക്കുന്നത്. അതിലേക്ക് വേണ്ടിയുള്ള പരിശീലനമാണ് ഇപ്പോൾ നടത്തുന്നത്. കാരണം, ചിത്രത്തിൽ ഒരു ബോക്സറുടെ വേഷമാണ് മോഹൻലാലിന്. കഴിഞ്ഞ ആറു മാസക്കാലമായി ഇതിനുള്ള കടുത്ത പരിശീലനത്തിലാണ് മോഹൻലാൽ.

മോഹൻലാലിനെ ബോക്സിംഗ് പരിശീലിപ്പിക്കുന്നത് പ്രശസ്ത ബോക്സിംഗ് കോച്ച് ആയ പ്രേംനാഥ് ആണ്. ദേശീയ ബോക്സിംഗ് ടീം അംഗമായ പ്രേംനാഥ് കൊൽക്കത്തയിൽ നിന്ന് 2005ലാണ് കോച്ചിംഗ് ഡിപ്ലോമ നേടിയത്. നിലവിൽ കേരള സ്റ്റേറ്റ് സ്പോർട്സ് കൗൺസിലിന്റെ ബോക്സിംഗ് കോച്ചാണ് അദ്ദേഹം. ബോക്സിംഗ് പരിശീലനം നൽകാൻ മോഹൻലാൽ തന്നെയാണ് തന്നെ നേരിട്ട് വിളിച്ചതെന്ന് പ്രേംനാഥ് ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ പറഞ്ഞു. എന്താണ് ആവശ്യമെന്ന് പറഞ്ഞപ്പോൾ രണ്ടാമതൊന്ന് ആലോചിക്കേണ്ട കാര്യം തനിക്ക് വന്നില്ലെന്നും അദ്ദേഹം പറഞ്ഞു.

ഏപ്രിൽ മാസത്തിലാണ് മോഹൻലാലിന് ബോക്സിംഗ് പരിശീലനം ആരംഭിച്ചത്. അറുപതു ദിവസത്തോളം ബ്രോഡാഡിയുടെ ഷൂട്ടിംഗുമായി ബന്ധപ്പെട്ട് ഹൈദരാബാദിൽ ആയിരുന്നെന്നും കൂടുതൽ ചിട്ടയായ പരിശീലനം ആ സമയത്താണ് നടന്നതെന്നും പ്രേംനാഥ് വ്യക്തമാക്കി. പരിശീലനം പ്ലാൻ ചെയ്യുന്നത് ലാൽസാറിന്റെ ഷൂട്ടിംഗ് ഷെഡ്യൂൾ അനുസരിച്ചാണെന്നും അദ്ദേഹം പറഞ്ഞു. ഇപ്പോൾ കുളമാവിൽ താൽക്കാലികമായി പണി കഴിപ്പിച്ച ബോക്സിംഗ് റിംഗിലാണ് പരിശീലനം. അതേസമയം, ഓരോ ദിവസവും മോഹൻലാലിന്റെ പ്രകടനം മെച്ചപ്പെട്ട് വരികയാണെന്നും ഒരു ചാമ്പ്യൻഷിപ്പിൽ അദ്ദേഹത്തിന് ധൈര്യമായി പങ്കെടുക്കാമെന്നും പ്രേംനാഥ് വ്യക്തമാക്കി. തന്റെ ഏറ്റവും സമർത്ഥരായ ശിഷ്യരിൽ ഒരാളാണ് അദ്ദേഹമെന്നും പ്രേംനാഥ് പറഞ്ഞു.