രാ രാ രാക്കമ്മയ്‌ക്ക് ചുവടു വെക്കൂവെന്ന് ജാക്വിലിൻ ഫെർണാണ്ടസ്; വിജയിക്ക് മൂവി പ്രീമിയറിൽ ഭാഗമാകാൻ അവസരം

ബോളിവുഡ് താരം ജാക്വിലിൻ ഫെർണാണ്ടസ്, തെന്നിന്ത്യൻ താരം കിച്ച സുദീപ് എന്നിവർ നായകരായി എത്തുന്ന പുതിയ കന്നഡ ചിത്രമാണ് വിക്രാന്ത് റോണ. ചിത്രത്തിലെ രാ രാ രാക്കമ്മ ഗാനം കഴിഞ്ഞദിവസം ആയിരുന്നു യുട്യൂബിൽ റിലീസ് ചെയ്തത്. ഒരു ഫാന്റസി ആക്ഷൻ ചിത്രമായാണ് വിക്രാന്ത് റോണ ഒരുങ്ങുന്നത്. ജൂലൈ 28ന് ചിത്രം പ്രേക്ഷകർക്ക് മുന്നിൽ പ്രദർശനത്തിന് എത്തും. കന്നഡയിൽ ഒരുങ്ങുന്ന ചിത്രമായ വിക്രാന്ത് റോണ മലയാളം, ഹിന്ദി, തമിഴ്, തെലുങ്ക്, ഇംഗ്ലീഷ് ഭാഷകളിൽ മൊഴി മാറ്റം നടത്തി എത്തും.

ചിത്രത്തിലെ രാരാ രാക്കമ്മ പാട്ടിന് ചുവടു വെക്കാൻ ആരാധകരെ ക്ഷണിച്ചിരിക്കുകയാണ് നായികയായ ജാക്വിലിൻ ഫെർണാണ്ടസ്. രാ രാ രാക്കമ്മയ്ക്ക് ചുവടു വെച്ച് അഞ്ചു ലക്ഷമോ അതിലധികമോ ലൈക്കും പത്തു ലക്ഷമോ അതിലധികമോ വ്യൂസും നേടുന്നവരെ കാത്തിരിക്കുന്നത് വമ്പൻ സമ്മാനമാണ്. വിക്രാന്ത് റോണ ടീം നൽകുന്ന ഒരു പേഴ്സണലൈസ്ഡ് ഹാംപർ ലഭിക്കുന്നതിന് ഒപ്പം സിനിമയുടെ പ്രീമിയറിൽ ഭാഗമാകാനുള്ള അവസരമാണ് കാത്തിരിക്കുന്നത്. #RaRaRakkamma എന്ന ഹാഷ് ടാഗിൽ വേണം വീഡിയോ പങ്കുവെക്കാൻ. വിക്രാന്ത് റോണയെ ടാഗ് ചെയ്യാനും മറക്കരുത്. ജൂലൈ 28നാണ് വിക്രാന്ത് റോണ റിലീസ് ചെയ്യുന്നത്.

അനൂപ് ഭണ്ഡാരി തന്നെയാണ് ചിത്രത്തിന്റെ തിരക്കഥയും സംവിധാനവും. ശാലിനി ജാക്ക് മഞ്ജു, അലങ്കാർ പാണ്ഡ്യൻ എന്നിവർ ചേർന്നാണ് ചിത്രം നിർമിക്കുന്നത്. സുദീപിന്റെ കിച്ച ക്രിയേഷൻസും നിർമാണത്തിൽ പങ്കാളിയാണ്. കാമറ – വില്യം ഡേവിസ്, സംഗീതസംവിധാനം – ബി അജിനേഷ് ലോകനാഥ്, എഡിറ്റിംഗ് – ആഷിഖ് കയ്സഗോളി. റാ റാ റാക്കമ്മ യുട്യൂബിൽ ഇതിനകം ഹിറ്റായി കഴിഞ്ഞു.