ദുല്‍ഖര്‍-റോഷന്‍ ആന്‍ഡ്രൂസ് ചിത്രത്തിന് ആശംസകള്‍ പറഞ്ഞ് ഡയാന; താനും ദുല്‍ഖര്‍ ഫാനാണെന്ന കമന്റുമായി ഫറാഖാന്‍

ദുല്‍ഖര്‍ സല്‍മാനെ നായകനാക്കി റോഷന്‍ ആന്‍ഡ്രൂസ് സംവിധാനം ചെയ്യുന്ന ചിത്രത്തില്‍ ബോളിവുഡ് താരം ഡയാന പെന്റി ജോയിന്‍ ചെയ്തു. ഡയാന തന്റെ ഇന്‍സ്റ്റഗ്രാം പേജിലൂടെയാണ് വിവരം അറിയിച്ചത്. ദുല്‍ഖറിനൊപ്പം ക്ലാപ് ബോര്‍ഡ് പിടിച്ചു നില്‍ക്കുന്ന ചിത്രമാണ് ഡയാന പങ്കുവെച്ചിരിക്കുന്നത്. പുതിയ തുടക്കത്തിന് ചിയേഴ്സ് എന്നാണ് ഡയാന ഇന്‍സ്റ്റഗ്രാമില്‍ കുറിച്ചത്. ദുല്‍ഖറും ഡയാനയെ ചിത്രത്തിലേക്ക് സ്വാഗതം ചെയ്ത് കൊണ്ട് പോസ്റ്റിട്ടിട്ടുണ്ട്.

‘പുതിയ തുടക്കത്തിന് ചിയേഴ്സ്. ഈ പുതിയ യാത്രയില്‍ ദുല്‍ഖറിനും, റോഷന്‍ ആന്‍ഡ്ര്യൂസിനുമൊപ്പം ചേരുന്നതില്‍ വലിയ സന്തോഷമുണ്ട്. എന്റെ ആദ്യ മലയാള ചിത്രം.’ ഡയാന കുറിക്കുന്നു. ഡയാനയുടെ സുഹൃത്തും സംവിധായികയുമായ ഫറാഖാനും പോസ്റ്റിന് താഴെ കമന്റ് ചെയ്തിട്ടുണ്ട്. താനും ദുല്‍ഖറിന്റെ ഫാനാണെന്ന കാര്യം പറഞ്ഞേക്കൂ എന്നാണ് ഫാറാഖാന്റെ കമന്റ്.

‘ഹേയ് സിനാമിക’ എന്ന തമിഴ് ചിത്രത്തിലാണ് ദുല്‍ഖര്‍ ഒടുവില്‍ അഭിയനിച്ചത്. കാജള്‍ അഗര്‍വാള്‍, അദിതി റാവു ഹൈദരി എന്നിവരാണ് ചിത്രത്തില്‍ നായികമാര്‍. ദുല്‍ഖര്‍ അഭിനയിച്ച ബിഗ് ബജറ്റ് മലയാള ചിത്രമായ കുറുപ്പ് റിലീസിനായി ഒരുങ്ങുകയുമാണ്.

ദുല്‍ഖറും റോഷന്‍ ആന്‍ഡ്രൂസും ഒരുമിക്കുന്ന ചിത്രത്തിന് തിരക്കഥയൊരുക്കുന്നത് ബോബി സഞ്ജയാണ്. ദുല്‍ഖറിന്റെ നിര്‍മ്മാണ കമ്പനിയായ വേഫെറെര്‍ ഫിലിംസിന്റെ ബാനറില്‍ ഒരുങ്ങുന്ന അഞ്ചാമത്തെ സിനിമ കൂടിയാണിത്.
മനോജ് കെ. ജയന്‍, അലന്‍സിയര്‍, ബിനു പപ്പു, വിജയകുമാര്‍, ലക്ഷ്മി ഗോപാലസ്വാമി തുടങ്ങിയവര്‍ മറ്റു പ്രധാന വേഷങ്ങളില്‍ എത്തുന്നുവെന്നാണ് റിപ്പോര്‍ട്ടുകള്‍.