ലാലേട്ടനോട് ‘ബറോസി’ല്‍ ചെറിയൊരു വേഷം കിട്ടുമോ എന്നു ചോദിച്ചിരുന്നു, കിട്ടുമെന്ന് തോന്നുന്നില്ലെന്ന് ദിലീപ്

മോഹന്‍ലാല്‍ ആദ്യമായി സംവിധാനം ചെയ്യുന്ന ബറോസ് സിനിമയുടെ പൂജ നടന്നത് കഴിഞ്ഞ ദിവസമാണ്. ബറോസിന്റെ പൂജാ വേളയില്‍ ദിലീപ് വെളിപ്പെടുത്തിയ ഒരു കാര്യമാണ് ഇപ്പോള്‍ വൈറലാകുന്നത്.

‘ലാലേട്ടനിലെ സംവിധായകന്റെ കഴിവുകള്‍ വളരെ നേരത്തെ തന്നെ അറിഞ്ഞിട്ടുള്ള വ്യക്തിയാണ് ഞാന്‍. ഉള്ളടക്കം എന്ന സിനിമ ചെയ്യുന്ന സമയത്ത് അതിലെ ഒരു സംഘട്ടന രംഗം ലാലേട്ടനാണ് ഒരുക്കിയത്. അന്ന് ഞാനും ലാല്‍ജോസുമായിരുന്നു അദ്ദേഹത്തിന്റെ സഹായികള്‍.

അവിടെ ഇടി ഇങ്ങനെ ഇടി എന്നൊക്കെ അദ്ദേഹം പറയുമ്പോള്‍ അതൊക്കെ ഞങ്ങള്‍ അനുകരിച്ചു കാണിക്കും. ലാലേട്ടന്‍ സംവിധാനം ചെയ്യുന്നുവെന്ന് കേട്ടപ്പോഴെ അദ്ദേഹത്തോടു ഞാന്‍ ചെറിയൊരു വേഷം ചോദിച്ചിരുന്നു. പക്ഷേ ഇപ്പൊള്‍ ഇതിലെ അഭിനേതാക്കളെ കാണുമ്പോള്‍ അതിനു സ്‌കോപ്പില്ല എന്നു തോന്നുന്നു.’ ദിലീപ് പറഞ്ഞു.

കൊച്ചിയിലെ നവോദയ സ്റ്റുഡിയോയില്‍ വച്ചാണ് ബറോസിന്റെ പൂജ ചടങ്ങുകള്‍ നടന്നത്. മമ്മൂട്ടി ഉള്‍പ്പെടെ മലയാള സിനിമാരംഗത്തെ പ്രമുഖര്‍ ചടങ്ങില്‍ സന്നിഹിതരായിരുന്നു. ബറോസ് ലോകശ്രദ്ധ നേടാന്‍ പോകുന്ന ചിത്രമാണ് എന്നാണ് ചടങ്ങില്‍ സംസാരിക്കവെ മമ്മൂട്ടി പറഞ്ഞത്. മലയാള സിനിമയില്‍ ഒരുപാട് നടന്‍മാന്‍ സംവിധായകരായിട്ടുണ്ട്. ഇപ്പോള്‍ അരയും തലയും മുറുക്കി മോഹന്‍ലാലും ഇറങ്ങിയിരിക്കുകയാണ് എന്ന് മമ്മൂട്ടി പറഞ്ഞു.