ദിവസവും 6 മണിക്കൂർ ഉറങ്ങണമെന്ന് പോത്തേട്ടൻ; ഈ ചിത്രത്തിനായി ഊണും ഉറക്കവും മാറ്റിവെച്ചിരിക്കുന്നുവെന്ന് ക്യാമറമാൻ..!

സൗബിൻ ഷാഹിർ, ഷെയ്ൻ നിഗം, ശ്രീനാഥ് ഭാസി എന്നിവരെ കേന്ദ്രകഥാപാത്രങ്ങളാക്കി മധു സി നാരായണൻ സംവിധാനം നിർവഹിക്കുന്ന കുമ്പളങ്ങി നൈറ്റ്‌സ് ഫെബ്രുവരി 7ന് തീയറ്ററുകളിൽ എത്താൻ ഒരുങ്ങുകയാണ്. ശ്യാം പുഷ്ക്കരൻ തിരക്കഥയും നസ്രിയ, ദിലീഷ് പോത്തൻ, ശ്യാം പുഷ്ക്കരൻ എന്നിവർ നിർമാണവും നിർവഹിക്കുന്ന ചിത്രത്തിൽ ഫഹദ് ഫാസിലും ശ്രദ്ധേയമായ ഒരു വേഷം കൈകാര്യം ചെയ്യുന്നുണ്ട്. ഫസ്റ്റ് ലുക്ക് പോസ്റ്ററിനും ടീസറിനും ആദ്യഗാനത്തിനും ലഭിച്ച മികച്ച പ്രതികരണത്തിന് പിന്നാലെ കുമ്പളങ്ങി നൈറ്റ്സ് ട്രെയ്‌ലർ ഇന്ന് വൈകിട്ട് പുറത്തിറങ്ങുന്നുണ്ട്.

അതിനിടയിൽ ശ്യാം പുഷ്ക്കരൻ ഡയറീസ് എന്ന പേരിൽ ചിത്രത്തിന്റെ ലൊക്കേഷൻ വിശേഷങ്ങൾ അണിയറ പ്രവർത്തകർ പങ്ക് വെക്കുന്നുണ്ട്. ആദ്യ വീഡിയോയിൽ സൗബിന്റെ രസകരമായ ഡബ്ബിങ് ആയിരുന്നു പങ്ക് വെച്ചത്. രണ്ടാമത്തെ വീഡിയോയിൽ ചിത്രത്തിന്റെ ക്രൂവിന് നിർമാതാവ് കൂടിയായ ദിലീഷ് പോത്തൻ നൽകുന്ന ടിപ്‌സും. ഇപ്പോൾ മൂന്നാമത്തെ വീഡിയോ അവർ പുറത്തിറക്കിയിരിക്കുന്നതിൽ അതിൽ ക്യാമറമാൻ ഷൈജു ഖാലിദിന്റെ ഛായാഗ്രഹണ മികവാണ് എടുത്തു കാണിച്ചിരിക്കുന്നത്. എല്ലാവരും 6 മണിക്കൂർ നിർബന്ധമായും ഉറങ്ങണം എന്ന് ദിലീഷ് പോത്തൻ പറയുമ്പോഴും ഈ സിനിമക്ക് വേദി ഊണും ഉറക്കവും മാറ്റി വെച്ചിരിക്കുകയാണെന്നാണ് ഷൈജു ഖാലിദ് വെളിപ്പെടുത്തുന്നത്..!