ബ്രഹ്മപുരം മാലിന്യപ്ലാന്റിലെ തീപിടുത്തം; സർക്കാരിനെതിരെ ഇൻസ്റ്റഗ്രാമിൽ സംവിധായകൻ ആഷിഖ് അബു

കൊച്ചി: കേരളത്തിന്റെ വ്യാവസായിക തലസ്ഥാനത്തെ പുകയിലാഴ്ത്തിയ ബ്രഹ്മപുരം മാലിന്യപ്ലാന്റിലെ തീപിടുത്തത്തിൽ സർക്കാരിനെ വിമർശിച്ച് സംവിധായകൻ ആഷിഖ് അബു. ഇൻസ്റ്റഗ്രാമിലൂടെ ആയിരുന്നു ആഷിഖ് അബുവിന്റെ വിമർശനം. നോട്ട് നിരോധന സമയത്ത് അതിനെ ന്യായീകരിക്കാൻ വന്ന വാദങ്ങളെ പോലെയാണ് തീപിടുത്ത സമയത്ത് ചിലർ ന്യായീകരണവുമായി എത്തിയത്. മാനുവൽ റോണി എന്നയാളുടെ ഇൻസ്റ്റഗ്രാം പോസ്റ്റ് സ്റ്റോറിയിൽ പങ്കുവെച്ച് ആയിരുന്നു ആഷിഖ് അബു ബ്രഹ്മപുരം വിഷയത്തിലെ തന്റെ പ്രതിഷേധം അറിയിച്ചത്.

നോട്ട് നിരോധന സമയത്ത് അതിനെ ന്യായീകരിക്കാന്‍ ഉയര്‍ന്നുവന്ന വാദങ്ങളും മാലിന്യപ്ലാന്റിലെ തീപിടിത്തം സംബന്ധിച്ച വാദങ്ങളും ചൂണ്ടിക്കാട്ടിയായിരുന്നു മാനുവല്‍ റോണിയുടെ പോസ്റ്റ്. ‘ഞാന്‍ ഒരു ദിവസം കാക്കനാട് പോയിരുന്നു. ഞാനൊരു പുകയും കണ്ടില്ല. തൃപ്പൂണിത്തുറ ഉള്ള എന്റെ അളിയന്‍ വിളിച്ചു. അവരുടെ കണ്ണ് ഇതുവരെ നീറിയില്ല. എറണാകുളത്ത് ഉള്ളവര്‍ അരാഷ്ട്രീയര്‍ ആണ്. അവര്‍ സ്വന്തം മാലിന്യങ്ങള്‍ സര്‍ക്കാരിനെ ഏല്‍പ്പിക്കുന്നു. എല്ലാ ആരോപണവും സംസ്ഥാന സര്‍ക്കാരിനെ തകര്‍ക്കാനാണ്’, – ആഷിഖ് പങ്കുവെച്ച ഇന്‍സ്റ്റഗ്രാം സ്റ്റോറിയില്‍ പറയുന്നു.

അതേസമയം ബ്രഹ്‌മപുരം തീപിടുത്തവുമായി ബന്ധപ്പെട്ട് മുഖ്യമന്ത്രി പ്രത്യേക പ്രസ്താവന നടത്തി. ബ്രഹ്മപുരം തീപിടിത്തവുമായി ബന്ധപ്പെട്ട് രജിസ്റ്റര്‍ ചെയ്ത ക്രിമിനില്‍ കേസ് പോലീസിന്റെ സ്പെഷ്യല്‍ ഇന്‍വെസ്റ്റിഗേഷന്‍ ടീം അന്വേഷിക്കുമെന്ന് മുഖ്യമന്ത്രി നിയമസഭയിൽ പറഞ്ഞു. ചട്ടം 300 അനുസരിച്ച് നിയമസഭയില്‍ നടത്തിയ പ്രസ്താവനയിലാണ് മുഖ്യമന്ത്രി ഇക്കാര്യം വ്യക്തമാക്കിയത്. മാര്‍ച്ച് 13-ഓടുകൂടി ബ്രഹ്മപുരത്തെ തീ പൂര്‍ണമായും അണയ്ക്കാനായി. എന്നാല്‍ ചെറിയ തീപിടിത്തങ്ങള്‍ ആവര്‍ത്തിക്കാനുള്ള സാധ്യത കണക്കിലെടുത്ത് തുടര്‍ന്നും ജാഗ്രത തുടരുമെന്നും മുഖ്യമന്ത്രി അറിയിച്ചു.