‘നസ്രിയ അപ്ഡേറ്റഡ് ആണ്, നസ്രിയ വന്നതിനു ശേഷം ഫഹദ് കുറേ ബെറ്റർ ആയി മാറി’: തുറന്നുപറഞ്ഞ് ഫാസിൽ

മലയാളത്തിന്റെ പ്രിയതാരങ്ങളായ ഫഹദിനെക്കുറിച്ചും നസ്രിയയെക്കുറിച്ചും മനസു തുറന്ന് ഫഹദിന്റെ പിതാവും സംവിധായകനുമായ ഫാസിൽ. മൂവി മാനിയയ്ക്ക് നൽകിയ അഭിമുഖത്തിൽ ആയിരുന്നു ഫാസിൽ മകനെയും മരുമകളെയും കുറിച്ച് മനസു തുറന്നത്. നസ്രിയ അപ്ഡേറ്റഡ് ആണെന്ന് പറഞ്ഞ് ഫാസിൽ നസ്രിയ എല്ലാ സിനിമകളും കാണുമെന്നും വ്യക്തമാക്കി. ‘പക്ഷേ, പുള്ളിക്കാരി പ്രൊഫഷണൽ ആർട്ടിസ്റ്റ് അല്ല. ആയിരുന്നിരിക്കാം. പക്ഷേ, വിവാഹത്തിന് ശേഷം പുള്ളിക്ക് കുടുംബബന്ധങ്ങളിലോട്ടാണ് താൽപര്യം. ഫഹദുമായിട്ട് വീട് ഇന്റീരിയർ ചെയ്യുന്നു. പെട്ടെന്ന് അഭിനയിക്കാൻ തോന്നി ഒരു കഥാപാത്രം മുന്നോട്ട് വന്നു കഴിഞ്ഞാൽ ചാടി ചെയ്യും. ഇപ്പോഴും എനിക്ക് തോന്നുന്നത് അങ്ങനെയാണ്. മലയാളത്തിൽ തന്നെ കഥ കേട്ടിട്ട് ഓ ഇതു ഞാൻ ചെയ്താൽ ശരിയാകത്തില്ല എന്നും പറഞ്ഞ് വിട്ടുകളയും. ഫഹദും നസ്രിയയും ഏകദേശം അങ്ങനെയൊരു സിങ്കുണ്ട്.’ – ഫാസിൽ പറഞ്ഞു.

‘ഫഹദ് അഭിനയിച്ച വിക്രം എന്ന പടം അത് മലയാളത്തിൽ ഡബ്ബ് ചെയ്യാനായിട്ട് വിളിച്ചപ്പോൾ ഫഹദ് പറ്റില്ലെന്ന് പറഞ്ഞു. കാരണം, അതിന്റെ ഫയറ് പോയി. തമിഴിൽ വന്ന് തമിഴില് ഡബ്ബ് ചെയ്ത് കഴിഞ്ഞപ്പോൾ അതിന്റെ ഫയറ് പോയി. വീണ്ടും മലയാളത്തിൽ ആർട്ടിഫിഷ്യൽ ആകാൻ പറ്റത്തില്ല. അതു തന്നെയാണ് നസ്രിയയും. തെലുങ്കിൽ ഒരു പടം ചെയ്യുന്നു. ഹിറ്റായി പടം. അവര് വന്ന് മലയാളത്തിൽ ഡബ്ബ് ചെയ്യാൻ പറഞ്ഞപ്പോൾ ചെയ്തില്ല. അപ്പോൾ ഇവർ രണ്ടു പേർക്കും ഫയർ ഉണ്ടാകണം. ആ ഫയർ ഉണ്ടായാലേ അവർ പടം ചെയ്യുകയുള്ളൂ. വളരെ ചുരുക്കം കേസിലേ അണ്ടർ പ്രഷർ ചെയ്യേണ്ടി വരാറുള്ളൂ.’

നസ്രിയ വന്നതിനു ശേഷം ഫഹദ് ഒന്നുകൂടി കുറേ ബെറ്റർ ആയി മാറിയെന്നും ഫാസിൽ പറഞ്ഞു. അല്ലായിരുന്നെങ്കിൽ വേറെ വല്ല റൂട്ടിലൊക്കെ ഫഹദ് പോയി പോയേനെ. നസ്രിയയുടെ ഒരു സാന്നിധ്യം ഫഹദിന് ഭയങ്കര ഹെൽപ് ഫുൾ ആയിട്ടുണ്ടെന്നും ഫാസിൽ പറഞ്ഞു.