ലാലേട്ടൻ ചുമ്മാ ഒരേ പൊളി; ആറാട്ട് നെയ്യാറ്റിൻകര ഗോപന്റെ ആറാട്ട് തന്നെയെന്ന് അരുൺ ഗോപി

ആരാധകരുടെ എല്ലാ പ്രതീക്ഷകളെയും സഫലമാക്കി നെയ്യാറ്റിൻകര ഗോപന്റെ ‘ആറാട്ട്’ തിയറ്ററുകളിൽ തുടങ്ങിയിട്ട് രണ്ട് ദിവസം. മോഹൻലാലിനെ നായകനാക്കി ബി ഉണ്ണിക്കൃഷ്ണൻ സംവിധാനം ചെയ്ത ചിത്രം ഫെബ്രുവരി 18നാണ് റിലീസ് ആയത്. തിയറ്ററുകളിൽ വലിയ പ്രതികരണമാണ് ചിത്രത്തിന് ലഭിച്ചു കൊണ്ടിരിക്കുന്നത്. ചിത്രത്തിന് പ്രേക്ഷകർ നൽകിയ സ്വീകരണത്തിന് കഴിഞ്ഞദിവസം ഫേസ്ബുക്ക് ലൈവിൽ എത്തി മോഹൻലാൽ നന്ദി അറിയിച്ചിരുന്നു. ആറാട്ടിനെ പ്രകീർത്തിച്ച് താരങ്ങളും സംവിധായകരും സോഷ്യൽ മീഡിയയിൽ എത്തി. ആറാട്ട് പേര് പോലെ തന്നെ നെയ്യാറ്റിൻകര ഗോപന്റെ ആറാട്ട് തന്നെയാണെന്ന് സംവിധായകൻ അരുൺ ഗോപി സോഷ്യൽ മീഡിയയിൽ കുറിച്ചു.

അരുൺ ഗോപി ഫേസ്ബുക്കിൽ പങ്കുവെച്ച കുറിപ്പ് ഇങ്ങനെ, ‘ആറാട്ട്…! പേര് പോലെ ശരിക്കും നെയ്യാറ്റിൻകര ഗോപന്റെ ആറാട്ട് തന്നെയാണ്..!! ഇലക്ടറിഫയിങ് പെർഫോമൻസ്..!! സിനിമ അവകാശപ്പെടുന്നത് പോലെ an unrealistic എന്റർടൈൻമെന്റ്..!! സിനിമ ആഘോഷിക്കുന്നവർ ആണ് നിങ്ങൾ എങ്കിൽ ആറാട്ട് നിങ്ങളെ നിരാശരാക്കില്ല..!! ലാലേട്ടൻ ചുമ്മാ ഒരേ പൊളി..! ആശംസകൾ’ – അരുൺ ഗോപി കുറിച്ചു. മോഹൻലാൽ, ബി ഉണ്ണിക്കൃഷ്ണൻ, ഉദയ് കൃഷ്ണ എന്നിവരെ ടാഗ് ചെയ്ത് ആയിരുന്നു അരുൺ ഗോപിയുടെ പോസ്റ്റ്.

അതേസമയം, നെയ്യാറ്റിൻകര ഗോപനെയും ആറാട്ട് സിനിമയെയും ഇരുകൈയും നീട്ടി സ്വീകരിച്ച പ്രേക്ഷകർക്ക് നന്ദി അറിയിച്ച് മോഹൻലാൽ കഴിഞ്ഞദിവസം ഫേസ്ബുക്ക് ലൈവിൽ എത്തിയിരുന്നു. ഫേസ്ബുക്ക് ലൈവിൽ എത്തിയാണ് മോഹൻലാൽ നന്ദി പറഞ്ഞത്. ആറാട്ട് എന്ന പേര് തന്നെ ഒരു ഫെസ്റ്റിവൽ മൂഡിനെ വെച്ചിട്ടാണ് നമ്മൾ വെച്ചിരിക്കുന്നത്. അത് വളരെയധികം ആളുകളിലേക്ക് എത്തി. അത് രണ്ടു കൈയും നീട്ടി സ്വീകരിച്ചതിൽ ഒരുപാട് സന്തോഷവും ഒരുപാട് നന്ദിയുമുണ്ടെന്നും മോഹൻലാൽ പറഞ്ഞു. ഒരുപാട് പേരോട് നന്ദി പറയാനുണ്ടെന്നും പ്രത്യേകിച്ച് എ ആർ റഹ്മാനോട് വളരെയധികം നന്ദി പറയുന്നെന്നും മോഹൻലാൽ പറഞ്ഞു.