‘ഒരു വര്‍ഷം ഓസ്‌ട്രേലിയയില്‍ ഇരുന്ന് പൂര്‍ത്തിയാക്കിയ തിരക്കഥ; നിര്‍മാതാവിനെ തേടും മുന്‍പ് പ്രധാന ഭാഗങ്ങള്‍ ഷൂട്ട് ചെയ്തു’; 21 ഗ്രാംസ് സംവിധായകന്‍ പറയുന്നു

അനൂപ് മേനോനെ കേന്ദ്രകഥാപാത്രമാക്കി ബിബിന്‍ കൃഷ്ണ സംവിധാനം ചെയ്ത ചിത്രമാണ് 21 ഗ്രാംസ്. ചിത്രത്തിന്റെ പേരും മുന്നോട്ടുവയ്ക്കുന്ന കഥാപശ്ചാത്തലവും പ്രേക്ഷകരില്‍ ആകാംക്ഷ ജനിപ്പിച്ചിട്ടുണ്ട്. ഇപ്പോഴിതാ ചിത്രത്തിന്റെ വിശേഷങ്ങള്‍ പങ്കുവച്ചിരിക്കുകയാണ് സംവിധായകന്‍ ബിബിന്‍ കൃഷ്ണ.

ഒരു വര്‍ഷം ഓസ്‌ട്രേലിയയില്‍ ഇരുന്ന് പൂര്‍ത്തിയാക്കിയതാണ് ചിത്രത്തിന്റെ തിരക്കഥയെന്ന് ബിബിന്‍ കൃഷ്ണ പറയുന്നു. അതിന് ശേഷം നാട്ടില്‍ വന്നു. നിര്‍മാതാവിനെ തേടുന്നതിന് മുന്‍പേ തന്റെ കൈയില്‍ ഉള്ള പരിമിതികള്‍ ഉപയോഗിച്ച് 21 ഗ്രാംസിന്റെ ചില പ്രധാന ഭാഗങ്ങള്‍ ഷൂട്ട് ചെയ്തിരുന്നു. പിന്നീടാണ് സുഹൃത്തും നിര്‍മ്മാതാവുമായ റിനീഷിനെ കാണാന്‍ എത്തുന്നതെന്നും അദ്ദേഹം പറഞ്ഞു.

കണ്ട് പഴകിയ ത്രില്ലറുകളില്‍ നിന്ന് വ്യത്യസ്തമായി പ്രേക്ഷരെ പിടിച്ചിരുത്താന്‍ എന്ത് ചെയാം എന്നായിരുന്നു എഴുതുമ്പോള്‍ ചിന്തിച്ചത്. സാധാരണ കാണുന്ന ക്ലിഷേ എടുത്തുകളയാന്‍ തന്നാല്‍ ആവുന്ന വിധം ശ്രമിച്ചിട്ടുണ്ട്. ഫീല്‍ ഗുഡ് മൂവിയേക്കാള്‍ തനിക്ക് എളുപ്പം തൃപ്തിപെടുത്താന്‍ പറ്റുന്ന കഥ ത്രില്ലറാണ്. ത്രില്ലര്‍ ആവുമ്പോള്‍ ആളുകളുടെ ഊഹങ്ങള്‍ തെറ്റുന്നത്തോടെ തന്റെ കഥ ജയിക്കും. എഴുതുന്ന സമയത്ത് ലോജിക്കല്‍ വശങ്ങളൊക്കെ മനസിലാക്കിയിരുന്നു. ഒരുപാട് പുസ്തകങ്ങള്‍ പഠിച്ചുവെന്നും ബിബിന്‍ കൃഷ്ണ കൂട്ടിച്ചേര്‍ത്തു.