‘പവർസ്റ്റാർ 100 കോടി കയറണ്ട, സത്യസന്ധമായ 40 കോടി ക്ലബിൽ മതി’: മനസു തുറന്ന് ഒമർ ലുലു

ഒരു സിനിമ റിലീസ് ആയി കഴിഞ്ഞാൽ ഏറ്റവും കൂടുതലായി കേൾക്കുന്ന ഒന്ന് ആ ചിത്രത്തിന്റെ വിജയത്തെക്കുറിച്ചാണ്. എത്ര കോടി ക്ലബിലേക്ക് ആ ചിത്രം എത്തി, എത്ര കോടി നേടി എന്നതൊക്കെ ആയിരിക്കും ചർച്ചയാകുന്നത്. ഏതായാലും അത്തരമൊരു ചർച്ചയ്ക്ക് വഴി തുറന്നിരിക്കുകയാണ് സംവിധായകൻ ഒമർ ലുലു. ബാബു ആന്റണിയെ നായകനാക്കി ഒമർ ലുലു സംവിധാനം ചെയ്യുന്ന ചിത്രമായ പവർസ്റ്റാർ റിലീസിന് ഒരുങ്ങുകയാണ്. ഏതായാലും തന്റെ ചിത്രം സത്യസന്ധമായ ഒരു 40 കോടി നേടിയാൽ മതിയെന്നാണ് ഒമർ ലുലു പറയുന്നത്.

ഒമർ ലുലു ഫേസ്ബുക്കിൽ പങ്കുവെച്ച ഒരു പോസ്റ്റിനു താഴെ കമന്റ് ബോക്സിൽ ഒരാൾ ‘പവർസ്റ്റാർ 100 കോടി ക്ലബിൽ കയറട്ടെ’ എന്ന് ആശംസകൾ നേർന്നിരുന്നു. ഇതിനു വളരെ രസകരമായ രീതിയിലാണ് ഒമർ മറുപടി നൽകിയിരിക്കുന്നത്. ‘പവർസ്റ്റാർ 100 കോടി ക്ലബിൽ കയറണ്ട, ആകെ നാല് കോടി ബജറ്റിൽ ചെയ്യുന്ന പവർസ്റ്റാർ 100 കോടി ക്ലബിൽ കേറിയാൽ എനിക്ക് അഹങ്കാരം വരും. അതുകൊണ്ട് സത്യസന്ധമായ 40 കോടി ക്ലബിൽ മതി’ – ഒമർ ലുലു മറുപടിയായി കുറിച്ചത് ഇങ്ങനെ. ഇതിന്റെ സ്ക്രീൻഷോട്ട് ‘സത്യസന്ധമായ ഒരു 40 കോടി ക്ലബ്’ എന്ന് കുറിച്ച് ഒമർ ലുലു പങ്കുവെയ്ക്കുകയും ചെയ്തു.

ചിത്രത്തിൽ ബാബു ആന്റണിക്കൊപ്പം ഹോളിവുഡ് താരം ലൂയിസ് മാൻഡിലോറും അബു സലിം, ബാബുരാജ്, റിയാസ് ഖാൻ എന്നിങ്ങനെ മലയാളി പ്രേക്ഷകരുടെ പ്രിയ താരങ്ങളും അണിനിരക്കുന്നുണ്ട്. ഒരു കാലഘട്ടത്തിൽ മലയാള സിനിമാ പ്രേക്ഷകർക്കിടയിൽ തന്റെ കിടിലൻ ആക്ഷൻ രംഗങ്ങളിലൂടെ യുവാക്കളുടെ ഇടയിൽ സൂപ്പർ താരമായി മാറിയ വ്യക്തിയായിരുന്നു ബാബു ആന്റണി. പിന്നീട് വില്ലൻ വേഷത്തിലും തിളങ്ങിയ ബാബു ആന്റണി ഒരിടവേളക്ക് ശേഷമാണ് സംവിധായകൻ ഒമർ ലുലു സംവിധാനം ചെയ്യാൻ പോകുന്ന ബിഗ് ബജറ്റ് ആക്ഷൻ ചിത്രമായ പവർ സ്റ്റാറിലൂടെ നായകനായി മലയാള സിനിമയിലേക്ക് തിരിച്ചെത്തുന്നത്.