നൂറാം ചിത്രവുമായി പ്രിയദർശൻ, നായകൻ മോഹൻലാൽ, തിരക്കഥ ഒരുക്കുന്നത് വിനീത് ശ്രീനിവാസൻ

സിനിമാസംവിധാന ജീവിതത്തിൽ തന്റെ നൂറാം ചിത്രവുമായി പ്രിയദർശൻ എത്തുന്നു. മോഹൻലാൽ ആണ് ചിത്രത്തിൽ നായകൻ. തിരക്കഥ ഒരുക്കുന്നത് വിനീത് ശ്രീനിവാസൻ. മോഹൻലാലും പ്രിയദർശനും വീണ്ടും ഒരുമിക്കുന്ന ചിത്രത്തിന് ഹരം എന്നാണ് പേരിട്ടിരിക്കുന്നത്. ഇത് ആദ്യമായാണ് മോഹൻലാൽ – പ്രിയദർശൻ കൂട്ടുകെട്ടിൽ ഒരുങ്ങുന്ന ചിത്രത്തിന് വിനീത് ശ്രീനിവാസൻ തിരക്കഥ ഒരുക്കുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് സിനിമ നിർമിക്കുന്നത്. സിനിമയുടെ ചിത്രീകരണം അടുത്തവ‍ർഷം ആരംഭിക്കും. കൊറോണ പേപ്പേഴ്സ് ആണ് പ്രിയദർശന്റെ സംവിധാനത്തിൽ ഒടുവിൽ പുറത്തിറങ്ങിയ ചിത്രം.

മരക്കാർ – അറബിക്കടലിന്റെ സിംഹം എന്ന ചിത്രത്തിന് ശേഷം പ്രിയദർശനും മോഹൻലാലും ഒന്നിക്കുന്ന ചിത്രമാണ് ഹരം. വൈകാതെ തന്നെ ചിത്രത്തിന്റെ പ്രഖ്യാപനം ഉണ്ടാകുമെന്നാണ് റിപ്പോർട്ടുകൾ. പ്രിയദർശൻ സംവിധാനം ചെയ്ത ആദ്യചിത്രമായ പൂച്ചയ്ക്കൊരു മൂക്കുത്തിയിൽ മോഹൻലാൽ ആയിരുന്നു നായകൻ. ഈ ചിത്രത്തോടെ ആരംഭിച്ച മോഹൻലാൽ – പ്രിയദർശൻ കോംബോ മലയാളസിനിമയ്ക്ക് നിരവധി ഹിറ്റുകൾ പിന്നീട് സമ്മാനിച്ചു.

ഒന്നാനാം കുന്നിൽ ഓരടി കുന്നിൽ, ബോയിംഗ് ബോയിംഗ്, ചെപ്പ്. വെള്ളാനകളുടെ നാട്, ആര്യൻ, ചിത്രം, വന്ദനം. അക്കരെ അക്കരെ അക്കരെ, ചന്ദ്രലേഖ, കാക്കക്കുയിൽ, കിളിച്ചുണ്ടൻ മാമ്പഴം, ഒപ്പം തുടങ്ങിയവയാണ് ശ്രദ്ധേയമായ പ്രിയദർശൻ – മോഹൻലാൽ കൂട്ടുകെട്ടിലെ ചിത്രങ്ങൾ. ഈ കൂട്ടുകെട്ടിൽ പിറന്ന മിക്ക ചിത്രങ്ങളും സൂപ്പർഹിറ്റുകൾ ആയിരുന്നു. ഏതായാലും ഈ കൂട്ടികെട്ടിലെ അടുത്ത സൂപ്പർഹിറ്റായ ഹരം എത്താനുള്ള കാത്തിരിപ്പിലാണ് ആരാധകർ.