‘യുവതാരങ്ങളിൽ ചിലർക്ക് അച്ചടക്കമില്ല, റിമയുടെ പ്രവൃത്തി വളരെ വേദനിപ്പിച്ചിട്ടുണ്ട്’; മനസു തുറന്ന് സിബി മലയിൽ

നിരവധി സിനിമകളിലൂടെ മലയാളി സിനിമാപ്രേമികളുടെ മനസിൽ ഇടം നേടിയ സംവിധായകനാണ് സിബി മലയിൽ. നിരവധി ചിത്രങ്ങളാണ് അദ്ദേഹം മലയാളികൾക്ക് സമ്മാനിച്ചിരിക്കുന്നത്. മുമ്പൊരിക്കൽ നടി റിമ കല്ലിങ്കലിനെ കുറിച്ച് സിബി മലയിൽ പറഞ്ഞ കാര്യങ്ങളാണ് ഇപ്പോൾ വൈറലായിരിക്കുന്നത്. യുവതാരങ്ങളുടെ അച്ചടക്കമില്ലായ്മയെക്കുറിച്ച് സംസാരിക്കവെയാണ് അദ്ദേഹം റിമ കല്ലിങ്കലിനെയും പരാമർശിച്ചത്.

യുവതാരങ്ങളിൽ ചിലർക്കെങ്കിലും അച്ചടക്കമില്ലായ്മയുണ്ട്. നടി റിമയുടെ പ്രവൃത്തി തന്നെ വേദനിപ്പിച്ചിട്ടുണ്ടെന്നും സിബി മലയിൽ പറഞ്ഞു. പുതിയ തലമുറയിലെ ചില ആളുകൾക്ക് അവരുടെ തലയിലൂടെയാണ് സിനിമ ഓടുന്നത് എന്ന ധാരണയുണ്ട്. തനിക്കും ചില അനുഭവങ്ങൾ ഉണ്ടായിട്ടുണ്ട്. അത് തന്റെ കരിയറിലെ ആദ്യത്തെ സംഭവമായിരുന്നെന്നും അദ്ദേഹം പറഞ്ഞു. ഒരിക്കൽ തന്നോട് പറയാതെ റിമ കല്ലിങ്കൽ ലൊക്കേഷനിൽ നിന്നും പോയെന്നും രാവിലെ ഷൂട്ടിങിന് വിളിക്കാൻ ചെന്നപ്പോൾ ആളില്ലാത്ത സ്ഥിതിയായിരുന്നു എന്നും ഇതൊക്കെ തന്നെ സംബന്ധിച്ചിടത്തോളം ആദ്യത്തെ സംഭവമായിരുന്നെന്നും സിബി മലയിൽ പറയുന്നു.

അതേസമയം, പ്രേം നസീർ അടക്കമുള്ള താരങ്ങൾ അവരുടെ സംവിധായകരോട് കാണിക്കുന്ന ബഹുമാനം കണ്ട് പഠിക്കേണ്ടത് തന്നെയാണെന്നും അദ്ദേഹം പറഞ്ഞു. വളരെ സീനിയറായിട്ടുള്ള ആർട്ടിസ്റ്റുകൾക്കൊപ്പം താൻ സഹ സംവിധായകനായിരുന്നപ്പോഴും അല്ലാത്തപ്പോഴും പ്രവൃത്തിച്ചിട്ടുണ്ട്. ഒരിക്കൽ നടൻ തിക്കുറുശ്ശിക്കൊപ്പം സിനിമ ചെയ്തപ്പോൾ അദ്ദേഹം തന്റെ അടുത്ത് വന്ന് മേക്കപ്പ് അഴിച്ചോട്ടെയെന്ന് ചോദിച്ചതിന് ശേഷമാണ് ചെയ്തത്. അത്രത്തോളം സീനിയറായ ആർട്ടിസ്റ്റായിട്ടു കൂടി അദ്ദേഹം നൽകിയ ബഹുമാനം വലുതാണെന്നും സിബി പറഞ്ഞു. ജ​ഗതി ശ്രീകുമാറും തിക്കുറിശ്ശിയെപ്പോലെ അനുവാദം ചോദിച്ച ശേഷമേ മേക്കപ്പ് അഴിക്കൂവെന്നും അത് അവരുടെ പ്രൊഫഷനോടുള്ള കമ്മിറ്റ്മെന്റാണ് കാണിക്കുന്നതെന്നും സിബി മലയിൽ പറഞ്ഞു.