അഭിനയിക്കുന്നവർ പഴയ നടിയുടെ അനിയത്തി അല്ലെങ്കിൽ നടന്റെ അനിയൻ..! ആരാധകന്റെ വിമർശനത്തിന് മറുപടിയുമായി വിനയൻ

പത്തൊമ്പതാം നൂറ്റാണ്ടിലെ തിരുവിതാംകൂറിന്റെ ഇതിഹാസ കഥ അഭ്രപാളികളിൽ ഒരുക്കി തന്റെ സ്വപ്ന പദ്ധതി സാക്ഷാത്കരിക്കുകയാണ് വിനയൻ. ചിത്രത്തിൽ കഥാപാത്രങ്ങളായി നവോത്ഥാന നായകൻ ആറാട്ടുപുഴ വേലായുധപ്പണിക്കർ, കായംകുളം കൊച്ചുണ്ണി, നങ്ങേലി തുടങ്ങി നിരവധി ചരിത്രപുരുഷന്മാർ ഉണ്ടായിരിക്കും. ഗോകുലം ഗോപാലനാണ് ചിത്രം നിർമ്മിക്കുന്നത്. സിജു വിൽസണാണ് ചിത്രത്തിലെ നായകൻ. കഥാപാത്രത്തിനായി സിജു വില്‍സണ്‍ കഴിഞ്ഞ ആറുമാസമായി കളരിപ്പയറ്റും കുതിരയോട്ടവും മറ്റ് ആയോധന കലകളും പരിശീലിച്ചിരുന്നു. സംവിധായകൻ വിനയൻ. കന്നഡ ചിത്രം മുകിൽ പെട്ട എന്ന ചിത്രത്തിലൂടെ പ്രശസ്തയായ കയാദു ലോഹറാണ് നായിക.

കഴിഞ്ഞ ദിവസം ചിത്രത്തിലെ ഒരു ക്യാരക്റ്റർ പോസ്റ്റർ സംവിധായകൻ പുറത്തുവിട്ടിരുന്നു. നവാഗതയായ വർഷ വിശ്വനാഥ് അവതരിപ്പിക്കുന്ന ജാനകി എന്ന കഥാപാത്രത്തിൻേറതാണ് സംവിധായകൻ പുറത്തുവിട്ടത്. തെന്നിന്ത്യൻ സിനിമയിലെ പ്രശസ്ത നായികയായിരുന്ന വാണി വിശ്വനാഥിൻെറ സഹോദരീപുത്രിയാണ് വർഷ വിശ്വനാഥ്. ശ്രീ ഗോകുലം ഗോപാലൻ നിർമ്മിക്കുന്ന “പത്തൊൻപതാം നൂറ്റാണ്ട്” 2022 ഏപ്രിലിലാണ് തീയറ്ററുകളിൽ എത്തുക.. സിജു വിൽസൺ നായകനായെത്തുന്ന ചിത്രത്തിൽ പ്രശസ്തരായ അൻപതിലേറെ താരങ്ങൾ അഭിനയിക്കുന്നുണ്ട്.

ഷാജികുമാറും, വിവേക് ഹർഷനും, എം ജയച്ചന്ദ്രനും, സന്തോഷ് നാരായണനും, അജയൻ ചാലിശ്ശേരിയും, സതിഷും, പട്ടണം റഷീദും, ധന്യ ബാലകൃഷ്ണനും, റഫീക് അഹമ്മദും പോലുള്ള പ്രഗത്ഭർ ഈ ചിത്രത്തിന്റെ അണിയറയിൽ പ്രവർത്തിക്കുന്നുണ്ട്. വർഷ വിശ്വനാഥിന്റെ പോസ്റ്ററിന് താഴെ ഒരു ആരാധകൻ ഇട്ട വിമർശനം നിറഞ്ഞ കമന്റിന് സംവിധായകൻ വിനയൻ നൽകിയ മറുപടി ശ്രദ്ധേയമാകുകയാണ്.

“സിനിമയിൽ അഭിനയിക്കുന്ന ആളുകൾ മുഴുവനും പഴയ നടിയുടെ അനിയത്തി അല്ലെങ്കിൽ പഴയ നടന്റെ അനിയൻ.. സിനിമ കുടുംബത്തിലെ അംഗങ്ങൾ ആയിരിക്കും….. അങ്ങനെയാ കണ്ടുവരുന്നത്….. അല്ലാതെ കഴിവ് ഉള്ള ഒരുപാട് പേർ ഒരു ചാൻസ് ചോദിച്ചാ കിട്ടില്ല എന്താ ഇതിന്റെ പിന്നിലെ രഹസ്യം…… അതോ … പൈസയാണോ പ്രശ്‌നക്കാരൻ….. സൗന്ദര്യമോ ….. സൗന്ദര്യം നോക്കിയാണ് അഭിനേതാവിനെ തീരഞ്ഞെടുക്കുന്നു എങ്കിൽ സത്യനേശൻ നാടാർ എന്ന സത്യൻ അതുല്യ പ്രതിഭ ഉണ്ടാക്കില്ല….. വിനയൻ എന്ന സംവിദായകനേ.. ബഹുമാനത്തോടെ ചോദിച്ചോട്ടേ.. സിനിമയിൽ അഭിനയിക്കാൻ വേണ്ട മാനദണ്ഡം എന്താണ് …… കഴിവ് … പൈസ …. സൗന്ദര്യം ….. വിദ്യാഭ്യാസം …….” എന്നാണ് ആരാധകൻ ചോദിച്ചത്. മറുപടിയായി വിനയൻ പറഞ്ഞിതിങ്ങനെയാണ്. “നിങ്ങൾ പറയുന്നതാണ് മാനദണ്ഡം എങ്കിൽ കലാഭവൻ മണിയേയും, ജയസൂര്യയേയും, മണിക്കുട്ടനേയും, സെന്തിലിനേയും ഒന്നും ഞാൻ നായകൻമാരാക്കില്ലായിരുന്നല്ലോ?” സംവിധായകന്റെ മറുപടിക്ക് നിറഞ്ഞ പിന്തുണയാണ് ഏവരും നൽകുന്നത്.