‘ഹൃദയത്തിന്റെ പകുതിക്ക് വെച്ച പലരും ഇറങ്ങിപ്പോയി, ഇടവേളയായപ്പോൾ സിനിമ തീർന്നെന്ന് പലരും കരുതി’ – വിനീത് ശ്രീനിവാസൻ

യുവമനസുകളെയും കുടുംബങ്ങളെയും കീഴടക്കി വിനീത് ശ്രീനിവാസൻ സംവിധാനം ചെയ്ത ഹൃദയം തിയറ്ററുകളിൽ ജൈത്രയാത്ര തുടരുകയാണ്. കോവിഡ് പ്രതിസന്ധിക്കിടയിലും ജനുവരി 21ന് ആയിരുന്നു ഹൃദയം സിനിമ റിലീസ് ചെയ്തത്. പ്രണവ് മോഹൻലാൽ, കല്യാണി പ്രിയദർശൻ, ദർശന രാജേന്ദ്രൻ എന്നിവർ പ്രധാന കഥാപാത്രങ്ങളായി എത്തിയ ചിത്രം പ്രേക്ഷകർ ഏറ്റെടുത്തു കഴിഞ്ഞു. വിനീതിന്റെ സംവിധാനത്തിൽ എത്തിയ അഞ്ചാമത്തെ സിനിമയാണ് ഹൃദയം.

അതേസമയം, കോഴിക്കോട് വടകരയിലെ ഒരു തിയറ്ററിൽ ഹൃദയം സിനിമ കണ്ടു കൊണ്ടിരുന്നവർ പകുതിയായപ്പോൾ സിനിമ കഴിഞ്ഞെന്ന് വിചാരിച്ച് ഇറങ്ങിപ്പോയിരുന്നു. ഓൺലൈൻ മാധ്യമമായ ബിഹൈൻവുഡ്സിന് നൽകിയ അഭിമുഖത്തിലാണ് വിനീത് ഇക്കാര്യം പറഞ്ഞത്. സിനിമയുടെ ഇടവേളയുടെ സമയത്ത് ഇടവേള എന്ന് എഴുതി കാണിച്ചിരുന്നില്ല. പകരം അണിയറപ്രവർത്തകരുടെ പേരുകളും മറ്റുമായിരുന്നു കാണിച്ചിരുന്നത്. ഇത് കണ്ട ചിലർ സിനിമ പകുതിയായപ്പോൾ സിനിമ കഴിഞ്ഞെന്ന് വിചാരിച്ച് ഇറങ്ങിപ്പോകുകയായിരുന്നു എന്ന് വിനീത് പറഞ്ഞു.

സിനിമ റിലീസായ ദിവസം തനിക്ക് ഒരുതരം മരവിപ്പ് ആയിരുന്നു എന്നാണ് വിനീത് പറഞ്ഞത്. ഇടവേളയുടെ സമയത്ത് ചിലർ വിളിച്ച് പടത്തിന് നല്ല അഭിപ്രായം ലഭിക്കുന്നുണ്ടെന്ന് പറഞ്ഞു. ആ സമയത്ത് താൻ അച്ഛന്റെ കൃഷിത്തോട്ടത്തിൽ ആകാശം നിൽക്കുകയായിരുന്നു. പിന്നീട് സുചിത്ര ആന്റി വിളിച്ച് പടം കാണാൻ വരുന്നില്ലേയെന്ന് ചോദിച്ചപ്പോഴാണ് താൻ സുബോധത്തിലേക്ക് എത്തിയതെന്നും മൂന്ന് മണിക്കൂർ എന്നുള്ളത് ആൾക്കാർക്ക് ലാഗ് അടിക്കുമോ എന്നുള്ള ടെൻഷൻ ഉണ്ടായിരുന്നെന്നും വിനീത് പറഞ്ഞു.