‘സുരക്ഷിതമാർന്ന തൊഴിലിടത്തിലേക്കുള്ള ആദ്യപടി’ അമ്മയുമായുള്ള ചർച്ചക്ക് ശേഷം നടിമാർ

ഏവരും ആകാംക്ഷയോടെ കാത്തിരുന്ന ഒന്നാണ് അഭിനേതാക്കളുടെ സംഘടനയായ അമ്മയും സംഘടനയിൽ നിന്നും രാജി വെച്ച് പുറത്തുപോയ നടിമാരും തമ്മിൽ ഇന്ന് വൈകിട്ട് നടന്ന ചർച്ച. ചർച്ചക്ക് ശേഷം മാധ്യമപ്രവർത്തകരെ കണ്ട നടിമാരായ രേവതി, പദ്മപ്രിയ, പാർവതി എന്നിവർ ചർച്ച ആരോഗ്യപരമായ ഒന്നായിരുന്നെന്ന് അഭിപ്രായപ്പെട്ടു. സുരക്ഷിതമായ ഒരു തൊഴിലിടത്തിലേക്കുള്ള തങ്ങളുടെ ആദ്യ ചുവടുവെപ്പ് ഇന്നുണ്ടായിയെന്നും അവർ അഭിപ്രായപ്പെട്ടു. നടിയെ ആക്രമിച്ച കേസിലകപ്പെട്ട ദിലീപിനെ തിരിച്ചെടുത്തതിൽ പ്രതിഷേധിച്ച് WCC യിലും അംഗങ്ങളായ ഈ നടിമാർ അമ്മയിൽ നിന്നും രാജി വെക്കുകയും ഒരു തുറന്ന കത്ത് അമ്മക്ക് എഴുതുകയും ചെയ്തു. അതിനെ തുടർന്നാണ് അമ്മ സംഘടന ഇവരെ ചർച്ചയ്ക്കായി ക്ഷണിച്ചത്. “ഇനി മുതൽ നിങ്ങളെന്നോ ഞങ്ങളെന്നോ ഒരു വേർതിരിവില്ല, ‘നമ്മൾ’ മാത്രമേ ഉള്ളൂ.” അമ്മയിലെ അംഗമായ നടൻ ജഗദീഷ് ചർച്ചക്ക് ശേഷം അഭിപ്രായപ്പെട്ടു