ഇതുവരെ ഭക്ഷണം കണ്ടിട്ടില്ലാത്ത പോലെ ഞാൻ അത് കഴിച്ചു; രസകരമായ ഷൂട്ടിംഗ് അനുഭവം പങ്കുവെച്ച് ദുൽഖർ

ഒരു നീണ്ട ഇടവേളയ്ക്ക് ശേഷം മലയാള സിനിമാ രംഗത്തേയ്ക്ക് തിരികെ എത്തിയിരിക്കുകയാണ് ദുൽഖർ സൽമാൻ. തമിഴിലും തെലുങ്കിലും ബോളിവുഡിലും ഒക്കെ താരം സജീവമായപ്പോൾ മലയാളത്തിലേക്ക് തിരികെയെത്തില്ലെ എന്ന ആശങ്ക ആരാധകർ അറിയിച്ചിരുന്നു. ആ കാത്തിരിപ്പിന് വിരാമമിട്ടുകൊണ്ട് ആരാധകർക്ക് ഒരു യമണ്ടൻ മറുപടിയുമായാണ് ഒരു യമണ്ടൻ പ്രേമകഥ എത്തിയത്. ചിത്രം മികച്ച പ്രതികരനങ്ങളോടെ മുന്നേറുകയാണ്.ഇതുവരെ ചെയ്ത കഥാപാത്രങ്ങളിൽ നിന്നും വ്യത്യസ്തമായി ലല്ലു എന്ന കഥാപാത്രത്തെയാണ് ചിത്രത്തിൽ ദുൽഖർ അവതരിപ്പിച്ചിരിക്കുന്നത്. ഇപ്പോൾ ചിത്രത്തിലെ രസകരമായ ഒരു സ്റ്റിൽ സോഷ്യൽ മീഡിയയിൽ പങ്കു വച്ചിരിക്കുകയാണ് ദുൽഖർ സൽമാൻ. മാങ്ങയിട്ട മീൻ കറി കൂട്ടി ചോറുണ്ണുന്ന ചിത്രമാണ് പങ്കുവെച്ചിരിക്കുന്നത്.

ഡയറ്റ് ശ്രദ്ധിക്കുന്ന കാര്യത്തിൽ താനും വാപ്പച്ചിയും ഒരുപോലെ ശ്രദ്ധാലുക്കൾ ആണെന്ന് ദുൽഖർ ഒരു അഭിമുഖത്തിനിടയിൽ പങ്കുവച്ചിരുന്നു.എന്നാൽ ചിത്രത്തിലെ ഈ സീനിൽ അഭിനയിക്കേണ്ടി വന്നില്ലെന്നും മറിച്ച് ജീവിക്കുകയായിരുന്നു എന്നും ഇതുവരെ ഭക്ഷണം കണ്ടിട്ടില്ലാത്ത ഒരു വ്യക്തിയെ പോലെ ആണ് താൻ ഊണ് കഴിച്ചതെന്നും  താരം പറയുന്നു.നവാഗതനായ ബി സി നൗഫല്‍ ആണ് ചിത്രം സംവിധാനം ചെയ്തത്. തിരക്കഥാകൃത്തുക്കളായ ബിബിന്‍ ജോര്‍ജും വിഷ്ണു ഉണ്ണികൃഷ്ണനും ചേര്‍ന്നാണ് ചിത്രത്തിന്റെ തിരക്കഥ രചിച്ചത്. സംയുക്ത മേനോന്‍, നിഖില വിമല്‍ എന്നിവരാണ് ചിത്രത്തിലെ നായികമാര്‍. സലിം കുമാര്‍, വിഷ്ണു ഉണ്ണികൃഷ്ണന്‍, സൗബിന്‍ ഷാഹിര്‍, ധര്‍മ്മജന്‍, ബിബിന്‍, സുരാജ് തുടങ്ങിയവരും അഭിനയിക്കുന്ന ഈ ചിത്രം ഒരു കംപ്ലീറ്റ് എന്റെര്‍റ്റൈനെര്‍ ആയാണ് ഒരുക്കിയിരിക്കുന്നത്.