ലാലേട്ടന്റെ പിറന്നാൾ സമ്മാനം…ദൃശ്യം രണ്ടാം ഭാഗത്തിന് ഔദ്യോഗിക പ്രഖ്യാപനം

മലയാള സിനിമയുടെ എക്കാലത്തെയും വലിയ നടന തിലകത്തിന് ഇന്ന് പിറന്നാൾ മംഗളങ്ങൾ.വിശ്വനാഥൻ നായരുടേയും ശാന്താകുമാരിയുടേയും പുത്രനായി പത്തനംതിട്ടയിലെ ഇലന്തൂരുള്ള വീട്ടിൽ ജനിച്ച ഈ താരരാജാവ് അറുപതാം ജന്മദിനം ആഘോഷിക്കുകയാണ് മേയ് 21ന്. തങ്ങളുടെ പ്രിയപ്പെട്ട ലാലേട്ടൻറെ പിറന്നാൾ എക്കാലവും ഓർത്തുവെക്കാൻ പാകത്തിന് അവിസ്മരണീയമാക്കാൻ ഉള്ള തയ്യാറെടുപ്പിലാണ് ലോകമെമ്പാടുമുള്ള ലാലേട്ടൻ ആരാധകർ.

മോഹൻലാലിന്റെ പിറന്നാളിനോട് അനുബന്ധിച്ച് ദൃശ്യം രണ്ടാം ഭാഗം പ്രഖ്യാപിച്ചിരിക്കുകയാണ് അണിയറ പ്രവർത്തകർ. കേരളത്തിൽ മാത്രം ഷൂട്ട് ചെയ്യപ്പെടുന്ന ഒരു ത്രില്ലർ ആയാണ് ദൃശ്യത്തിന്റെ രണ്ടാം ഭാഗം ഒരുക്കുന്നത്. ലോക് ഡൗൺ അവസാനിച്ചു കഴിഞ്ഞാൽ 60 ദിവസത്തിനുള്ളിൽ ചിത്രത്തിൻറെ ഷൂട്ടിംഗ് പൂർത്തിയാക്കും. ജീത്തു ജോസഫ് തന്നെയാണ് ഈ ചിത്രത്തിന് തിരക്കഥയൊരുക്കുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ചിത്രം നിർമ്മിക്കുന്നത്. മലയാള സിനിമയിലെ ത്രില്ലർ സിനിമകൾക്ക് വേറിട്ട് മാനം നൽകിയ ദൃശ്യം മലയാള സിനിമയ്ക്ക് ആദ്യമായി 50 കോടി ക്ലബ് സ്വപ്നം കാണാമെന്ന് പഠിപ്പിക്കുകയും ചെയ്തു. ജോർജുകുട്ടി വീണ്ടും വരുമ്പോൾ വരുണിന്റെ കേസിന്റെ ബാക്കി അന്വേഷണമാണോ നടക്കാനുള്ളത് എന്ന ചോദ്യമാണ് പ്രേക്ഷകർ ഇപ്പോൾ ചോദിക്കുന്നത്. മോഹൻലാലിൻറെ പിറന്നാൾ ദിനമായ ഇന്ന് ആരാധകർക്കുള്ള സർപ്രൈസ് പോലെയാണ് ഈ ചിത്രത്തിൻറെ പ്രഖ്യാപനം.