ഇരുപത്തിയേഴ് കോടിയിലേറെ കളക്ഷനുമായി ഡ്രൈവിങ് ലൈസൻസ്; ചിത്രം ബ്ലോക്ക്ബസ്റ്റർ ഹിറ്റ്

യുവ സൂപ്പർ താരം പൃഥ്വിരാജ് സുകുമാരനും സുരാജ് വെഞ്ഞാറമൂടും കേന്ദ്ര കഥാപാത്രങ്ങളെ അവതരിപ്പിച്ച് ക്രിസ്മസ് റിലീസ് ആയി തിയേറ്ററുകളിലെത്തിയ ചിത്രമാണ് ഡ്രൈവിംഗ് ലൈസെൻസ്. ചിത്രം സംവിധാനം ചെയ്തത് ലാൽ ജൂനിയറും രചിച്ചത് സച്ചിയും ആണ്. ഈ ചിത്രം നിർമ്മിച്ചത് പൃഥ്വിരാജ് പ്രൊഡക്ഷൻസ്, മാജിക് ഫ്രെയിംസ് എന്നീ ബാനറുകളിൽ പൃഥ്വിരാജ് സുകുമാരൻ, ലിസ്റ്റിൻ സ്റ്റീഫൻ എന്നിവർ ചേർന്നാണ്. ചിത്രം ഇപ്പോൾ ബ്ലോക്ക്ബസ്റ്റർ വിജയമാണ് നേടിയിരിക്കുന്നത്. 2019 ഡിസംബർ റിലീസ് ആയി എത്തിയ മലയാളം ചിത്രങ്ങളിൽ ബ്ലോക്ക്ബസ്റ്റർ വിജയം നേടിയ ഏക ചിത്രം കൂടിയായി ഡ്രൈവിംഗ് ലൈസൻസ് മാറിയിരിക്കുകയാണ്. ട്രേഡ് അനലിസ്റ്റുകൾ പുറത്തു വിട്ട ഈ ചിത്രത്തിന്റെ ഇരുപതു ദിവസത്തെ വേൾഡ് വൈഡ് കളക്ഷൻ റിപ്പോർട്ട് പ്രകാരം കേരളത്തിൽ 19 കോടി നാൽപ്പതു ലക്ഷം രൂപ കളക്ഷൻ നേടിയ ഈ ചിത്രം റസ്റ്റ് ഓഫ് ഇന്ത്യ മാർക്കറ്റിൽ നിന്ന് നേടിയെടുത്തത് എൺപത്തിയഞ്ചു ലക്ഷം രൂപയാണ്.

ഒപ്പം ഓവർസീസ് മാർക്കറ്റിൽ നിന്ന് ഈ ചിത്രം നേടിയ കളക്ഷൻ 6 കോടി നാൽപ്പതു ലക്ഷം രൂപയാണ്. ഇതിന്റെ വേൾഡ് വൈഡ് ഗ്രോസ് ഇരുപത്തിയേഴു കോടി രൂപയ്ക്കു മുകളിൽ എത്തിയപ്പോഴേക്കും മുപ്പതു കോടിക്ക് മുകളിൽ ഈ ചിത്രം കളക്ഷൻ നേടും എന്നുറപ്പായി കഴിഞ്ഞു. ഇതോടെ കഴിഞ്ഞ വർഷം ഏറ്റവും കൂടുതൽ കേരളാ ഗ്രോസ് കളക്ഷൻ നേടിയ മലയാള ചിത്രങ്ങളുടെ പട്ടികയിലും ഡ്രൈവിംഗ് ലൈസെൻസ് ഇടം പിടിച്ചിരിക്കുകയാണ്. ലൂസിഫർ, മധുര രാജ, തണ്ണീർ മത്തൻ ദിനങ്ങൾ, ലവ് ആക്ഷൻ ഡ്രാമ, എന്നിവ കഴിഞ്ഞു അഞ്ചാം സ്ഥാനത്തു ആണ് ഡ്രൈവിംഗ് ലൈസെൻസ് എത്തിയിരിക്കുന്നത്. കുമ്പളങ്ങി നൈറ്റ്സ്, ഇട്ടിമാണി മേഡ് ഇൻ ചൈന, മാമാങ്കം, ഒരു യമണ്ടൻ പ്രേമകഥ എന്നിവ ആറു മുതൽ ഒൻപതു വരെ സ്ഥാനങ്ങളിൽ ഉണ്ട്.