ഒരു സിനിമ മലയാളികളുടെ ഇന്റലിജൻസിനെ ചോദ്യം ചെയ്യുന്നതാണേൽ മലയാളികൾ ആ സിനിമ കാണില്ല:ദുൽഖർ

സോനം കപൂർ പ്രധാനവേഷത്തിലെത്തുന്ന സോയ ഫാക്ടറിലൂടെ ബോളിവുഡിലും തന്റെ നിലയുറപ്പിക്കാൻ ഉള്ള പരിശ്രമത്തിലാണ് ദുൽഖർ സൽമാൻ. മലയാള സിനിമയ്ക്ക് ഇത്രയേറെ ക്വാളിറ്റിയുണ്ടാക്കാന്‍ കഴിയുന്നതെങ്ങനെ എന്ന അനുപമ ചോപ്രയുടെ ചോദ്യത്തിന് ദുല്‍ഖര്‍ നല്‍കിയ മറുപടി ഇപ്പോൾ ഏറെ ശ്രദ്ധ നേടുകയാണ്. മലയാളം ഇൻഡസ്ട്രി വളരെ ചെറുതാണെന്നും 150 മുതൽ 200 വരെ തീയേറ്ററുകൾ ആണ് ഉള്ളതെന്നും ദുൽഖർ പറയുന്നു. അതിൽ 75 തിയേറ്ററിൽ പടം ഓടി കഴിഞ്ഞാൽ തന്നെ സിനിമ ആദായകരമാകും. ഒരു സിനിമ മലയാളികളുടെ ഇന്റലിജൻസിനെ ചോദ്യം ചെയ്യുന്നത് ആണെങ്കിലോ അവരുടെ പണവും സമയവും നഷ്ടപ്പെടുത്തുന്നതാണ് എന്ന് മനസ്സിലാക്കിയാലോ മലയാളികൾ ആ ചിത്രം കാണില്ല എന്നും അതിൽ കാമ്പ് ഉണ്ടെങ്കിൽ ചിത്രത്തെ പ്രോത്സാഹിപ്പിക്കും എന്നും ദുൽഖർ പറഞ്ഞുകൊണ്ട് ഉദാഹരണമായി കുമ്പളങ്ങിയുടെ വിജയമാണ് അദ്ദേഹം ചൂണ്ടിക്കാണിക്കുന്നത്.

ബോളിവുഡ് വളരെ വലിയ ഒരു ഇൻഡസ്ട്രി ആയതുകൊണ്ട് അവിടെ ഒരു ചിത്രം മോശമായാൽ അത് രാജ്യാന്തരതലത്തിൽ ബാധിക്കുമെന്നും എന്നാൽ മലയാളം ഇൻഡസ്ട്രി വളരെ ചെറുതായതിനാൽ അവിടുത്തെ വിജയചിത്രങ്ങൾ മാത്രമേ മറ്റു ഭാഷകൾ സംസാരിക്കുന്നവരുടെ ശ്രദ്ധയിൽപ്പെടുക ഉള്ളൂ എന്നും താരം പറയുന്നു. മലയാളം ഇൻഡസ്ട്രിയാണ് ഏറ്റവും മികച്ചത് എന്ന അഭിപ്രായത്തോട് ഞാൻ യോജിക്കുന്നില്ല എന്നും ദുൽഖർ തുറന്നുപറഞ്ഞു. നല്ല കണ്ടന്റുകൾ സ്വീകരിക്കുന്നതിൽ മലയാളം ഇൻഡസ്ട്രി വളരെ മുന്നിലാണ് എന്നും മലയാളികൾ അത്തരം സിനിമകളെ പ്രോത്സാഹിപ്പിക്കുന്നത് സംവിധായകരെ പുതിയ വഴികൾ തേടി പോകാൻ സഹായിക്കുന്നു എന്നും താരം കൂട്ടിച്ചേർത്തു.