‘സിനിമാതാരങ്ങൾക്ക് എന്തുമാകാം, ഞങ്ങളെപ്പോലുള്ള ബ്ലോഗർമാർ എന്ത് ചെയ്താലും അത് നിയമവിരുദ്ധം’ – 9 മണിക്ക് ശക്തമായി പ്രതികരിക്കുമെന്ന് ഇ-ബുൾ ജെറ്റ്

അനുവാദമില്ലാതെ വാഹനം രൂപമാറ്റം ചെയ്തതിന്റെ പേരിൽ മോട്ടോർവാഹന വകുപ്പ് ഇ – ബുൾ ജെറ്റിനെതിരെ നടപടി സ്വീകരിച്ചത് കേരളത്തിൽ വൻ വിവാദമായിരുന്നു സൃഷ്ടിച്ചത്. ഇപ്പോൾ കുറുപ് സിനിമയുടെ പ്രമോഷന് വേണ്ടി കാറിൽ സിനിമയുടെ സ്റ്റിക്കർ പതിപ്പിച്ചതിൽ പ്രതിഷേധവുമായി രംഗത്ത് എത്തിയിരിക്കുകയാണ് ഇ-ബുൾ ജെറ്റ് സഹോദരങ്ങൾ. ഫേസ്ബുക്കിൽ പങ്കുവെച്ച കുറിപ്പിൽ ഇന്ന് രാത്രി ഒമ്പതുമണിക്ക് എതിരെ ഇതിനെതിരെ ശക്തമായി പ്രതികരിക്കും എന്നാണ് ഇവർ അറിയിച്ചിരിക്കുന്നത്.

സോഷ്യൽ മീഡിയയിൽ ഇ-ബുൾ ജെറ്റ് പങ്കുവെച്ച കുറിപ്പ്, ‘എംവിഡി ഈ ഇരട്ടത്താപ്പ് നയമാണ് ആദ്യം അവസാനിപ്പിക്കേണ്ടത്. രണ്ടു വണ്ടിയും വൈറ്റ് ബോർഡ്. പക്ഷേ ഞങ്ങൾ ചെയ്ത തെറ്റ് കുറുപ്പിന്റെ പ്രമോഷൻ ചെയ്ത ഈ വണ്ടി ശരി. കേരളത്തിന്റെ അങ്ങേയറ്റം മുതൽ ഇങ്ങേയറ്റം വരെ ഓടിയ വണ്ടി ഇതുവരെ ഒരു ഉദ്യോഗസ്ഥർ പോലും പരിശോധിച്ചിട്ട് പോലുമില്ല. സിനിമാതാരങ്ങൾക്ക് എന്തും ആകാം പക്ഷേ ഞങ്ങളെപ്പോലുള്ള പാപം ബ്ലോഗർമാർ എന്തുചെയ്താലും അത് നിയമവിരുദ്ധമാക്കി കാണിക്കാൻ ഇവിടെ പലരും ഉണ്ട്. ഒരു മീഡിയക്കാർ പോലും ഈ ഒരു കാര്യം പുറത്തു പോലും കൊണ്ടുവന്നിട്ടില്ല. ഞങ്ങൾ അതിശക്തമായി ഇന്ന് രാത്രി 9 മണിക്ക് ഇതിനെതിരെ ഞങ്ങൾ പ്രതികരിക്കുന്നു. എന്നാൽ, ഈ വാഹനം കൊണ്ട് ദുൽഖർ സൽമാൻ ഡ്രാഫ്റ്റ് ചെയ്യുകയും പല അഭ്യാസങ്ങൾ കാണിക്കുകയും ചെയ്തപ്പോൾ അത് സമൂഹത്തിന് നല്ലതും ഞങ്ങൾ തെറ്റ് ആയി മാറുന്നത് എങ്ങനെ എന്ന് എനിക്ക് മനസ്സിലാവുന്നില്ല. പാവപ്പെട്ട വണ്ടിയിൽ നിന്നും ഉപജീവനം നേടുന്നവരെ ദ്രോഹിക്കുകയും ഇവരെ പോലുള്ള നടന്മാരെ പൂജിക്കുകയും ചെയ്യുന്നത് എവിടെ നിന്നാണ് എന്ന് എനിക്ക് മനസ്സിലാകുന്നില്ല’.

അതേസമയം, ദുൽഖറിന്റെ കുറുപ് സിനിമയുടെ പ്രമോഷനുമായി ബന്ധപ്പെട്ട് കാറിൽ സ്റ്റിക്കർ ഒട്ടിച്ചതി വിശദീകരണവുമായി അണിയറപ്രവർത്തകർ രംഗത്തെത്തി. നിയമപ്രകാരം പണം നൽകിയാണ് ഇത്തരത്തിൽ സ്റ്റിക്കർ ഒട്ടിച്ച് പ്രചാരണം നടത്തിയതെന്ന് ടീം പറഞ്ഞു. പാലക്കാട് ആർ ടി ഒ ഓഫീസിൽ ഇതുമായി ബന്ധപ്പെട്ട നിയമപ്രകാരമുള്ള എല്ലാ കാര്യങ്ങളും ചെയ്തിട്ടുണ്ടെന്നും വാഹനം റോഡിൽ ഇറക്കിയത് അതിനു ശേഷമാണെന്നും സിനിമയുടെ അണിയറക്കാർ പറഞ്ഞു.