‘മാലിക്കി’ലെ 55കാരന്റെ ഗെറ്റപ്പ്; പ്രചോദനമായത് അച്ഛന്റേയും മുത്തച്ഛന്റേയും ശരീരപ്രകൃതമാണെന്ന് ഫഹദ്

മഹേഷ് നാരായണന്‍ സംവിധാനം ചെയ്യുന്ന ഫഹദ് ചിത്രമാണ് മാലിക്. ചിത്രത്തിന്റെ ട്രെയിലര്‍ കഴിഞ്ഞ ദിവസമാണ് റിലീസ് ചെയ്തത്. സുലൈമാന്‍ എന്ന കഥാപാത്രമായാണ് ചിത്രത്തില്‍ ഫഹദ് എത്തുന്നത്. പല കാലഘട്ടങ്ങളിലായി പറഞ്ഞു പോകുന്ന കഥയായതിനാല്‍ 20 വയസ് മുതല്‍ 57 വയസ്സ് വരെയുള്ള സുലൈമാനെയാണ് ചിത്രത്തില്‍ അവതരിപ്പിച്ചിരിക്കുന്നത്.

ഇതിനായി ഫഹദ് ശാരീരികമായ മാറ്റങ്ങളും വരുത്തിയിരുന്നു. സുലൈമാന്‍ മാലിക് എന്ന കഥാപാത്രത്തിന്റെ ഗെറ്റപ്പിന് പ്രചോദനമായത് അച്ഛനും മുത്തച്ഛനുമാണെന്നാണ് ഫഹദ് ഫാസില്‍ പറയുന്നത്. മനോരമയ്ക്ക് നല്‍കിയ അഭിമുഖത്തിലാണ് താരം ഇക്കാര്യം വെളിപ്പെടുത്തിയത്.

ഫഹദ് ഫാസിലിന്റെ വാക്കുകള്‍:

‘ആദ്യമായാണ് മധ്യവയസ്‌കനായി അഭിനയിക്കുന്നത്. ഇതിനു മുമ്പ് ചെയ്ത സിനിമകളെല്ലാം എന്റെ പ്രായത്തിനൊത്ത കഥാപാത്രങ്ങളായിരുന്നു. ഈ കഥാപാത്രത്തെ ഒട്ടും ഡ്രമാറ്റിക്ക് ആക്കാതെ എങ്ങനെ ചെയ്യാന്‍ പറ്റുമെന്ന് ആ സമയത്ത് ആലോചിച്ചിരുന്നു. അപ്പോഴാണ് ശരീരഭാരം കുറച്ചു നോക്കിയാല്‍ എങ്ങനെ ഇരിക്കും എന്ന ചിന്ത വരുന്നത്. എന്റെ അച്ഛനും മുത്തച്ഛനുമൊക്കെ പ്രായമാകുമ്‌ബോള്‍ അല്‍പം മെലിഞ്ഞുവരുന്ന ശരീരപ്രകൃതമുളളവരാണ്. എന്റെ ശരീരപ്രകൃതവും അങ്ങനെയായിരിക്കും എന്നുതോന്നി. അവരുടെ ഫോട്ടോസ് മഹേഷിനെ കാണിക്കുകയും അങ്ങനെയാണ് ആ മേക്കോവറിലേയ്ക്ക് എത്തുകയുമായിരുന്നു.