എന്താണ് ‘ഫോർപ്ലേ’? ഒരു ആഴ്ചയായി മലയാളി ഗൂഗിളിനോട് ചോദിക്കുന്നത് ഇതാണ്..! അതിനും കാരണം ദി ഗ്രേറ്റ് ഇന്ത്യൻ കിച്ചൻ..!

സുരാജ് വെഞ്ഞാറമൂട്, നിമിഷ സജയൻ എന്നിവരെ കേന്ദ്രകഥാപാത്രങ്ങളാക്കി ജിയോ ബേബി സംവിധാനം നിർവഹിച്ച ദി ഗ്രേറ്റ് ഇന്ത്യൻ കിച്ചൻ എന്ന സിനിമ റിലീസിന്റെ അന്ന് മുതൽ വളരെ വലിയ ചർച്ചാവിഷയമാണ്. ചിത്രത്തിന്റെ പ്രമേയവും അവതരണവും അഭിനേതാക്കളുടെ പ്രകടനങ്ങളുമെല്ലാം അതിന് കാരണമായിട്ടുണ്ട്. ചിത്രം ഇറങ്ങിയത് മുതൽ മലയാളികളെ എന്താണ് ഫോർപ്ലേ എന്ന് ഗൂഗിളിൽ സെർച്ച് ചെയ്യിക്കുവാനും അത് ട്രെൻഡിങ്ങ് ലിസ്റ്റിൽ വരുവാനും കാരണമായി തീർന്നിരിക്കുകയാണ് ഈ കൊച്ചു വലിയ ചിത്രം.

സിനിമയിൽ നായിക ഫോർപ്ലേയെ കുറിച്ച് നായകനോട് സംസാരിക്കുന്നുണ്ട്. അപ്പോൾ മുതലാണ് ചില മലയാളികൾക്ക് ഇതെന്താണ് സംഭവം എന്നറിയുവാൻ ഉള്ള ആഗ്രഹം ഉദിച്ചത്. അവർക്ക് ചോദിക്കുവാൻ ഗൂഗിളുണ്ടല്ലോ. അവർ ചോദിക്കുകയും ചെയ്‌തു. ഗൂഗിൾ സേർച്ചിന്റെ കണക്കുകൾ പ്രകാരം കഴിഞ്ഞ ഒരാഴ്ചയായി ഇന്ത്യയിൽ ഫോർപ്ലേ സേർച്ച് ചെയ്യുന്നതിൽ മുന്നിൽ മലയാളികളാണ്. മലയാളത്തിൽ ഇതിന് എന്താണ് പറയുന്നത് എന്നും സെർച്ച് ചെയ്യുന്നവരുണ്ട്. രതിസുഖത്തിനായി ശരീരത്തെ ഉത്തേജിപ്പിക്കുന്ന ബാഹ്യ ചേഷ്ടകളേയും ബാഹ്യകേളികളേയുമെല്ലാം ഒന്നായി പറയുന്ന ഒരു വാക്കാണ് ഫോർപ്ളേ.