ജോർജുകുട്ടിയുടെ കൃഷിയും സാമ്പത്തികവും മെച്ചപ്പെട്ടു; കാർ പോർച്ച് വാർത്തു..!

മലയാളികളുടെ മനസ്സിൽ ഇപ്പോഴും മായാതെ നിൽക്കുന്ന വീടുകളിലൊന്നാണ് ദൃശ്യത്തിലെ ജോർജുകുട്ടിയുടേത്. സിനിമയുടെ ഒട്ടു മിക്ക ഭാഗങ്ങളും ചിത്രീകരിച്ച ഇടങ്ങളിൽ ഒന്ന് എന്ന നിലയിൽ.പ്രേക്ഷകർക്ക് ഏറെ സുപരിചിതമാണ് ഈ വീട്. ദൃശ്യം രണ്ടാം ഭാഗം ഷൂട്ട് തുടങ്ങിയതോടെ ആ വീടും വീണ്ടും വാർത്തകളിൽ ഇടം പിടിക്കുകയാണ്. കർഷകനായ വഴിത്തല സ്വദേശി മഠത്തിപ്പറമ്പിൽ ജോസഫിന്റെയാണ് ആ വീട്. രണ്ടാം ഭാഗത്തിൽ വീടിന് ചില മാറ്റങ്ങളൊക്കെ വന്നിരിക്കുകയാണ്.

കാലത്തിന്‍റെ മാറ്റങ്ങൾ വീടിനുമുണ്ട്. കൃഷിയെല്ലാം മെച്ചപ്പെട്ടു. സാമ്പത്തികമായി ഉയർന്നതോടെ ജോർജുകുട്ടി വീടൊന്ന് മോടി കൂട്ടി. ഷീറ്റിട്ടിരുന്ന കാർപ്പോർച്ച് വാർത്തു. ഒരു മുറി കൂട്ടിയെടുത്തു. മുറ്റത്ത് ടൈൽസ് ഉണ്ട്. കർഷകനായ ജോർജുകുട്ടിയുടെ പറമ്പ് മുഴുവൻ വാഴയും കപ്പയുമെല്ലാം വിളഞ്ഞ് കിടക്കുകയാണ്. ഷൂട്ടിങ് തുടങ്ങിയാൽ വിളവെടുപ്പ് ആരംഭിക്കാം. ദൃശ്യത്തിന്റെ തമിഴ് റീമേക്കായ കമലഹാസൻ ചിത്രം പാപനാശവും ഇവിടെ തന്നെയാണ് ഷൂട്ട് ചെയ്‌തത്‌. കോവിഡ് മുൻകരുതലിന്റെ ഭാഗമായി ഷൂട്ട് തുടങ്ങിയാൽ വേറെയാരെയും വീട്ടിലേക്ക് പ്രവേശിപ്പിക്കില്ല എന്നാണ് അണിയറക്കാർ അറിയിച്ചിരിക്കുന്നത്.