ദൃശ്യം 2വിന് ആമസോൺ നൽകിയത് കോടികൾ..! കണക്കുകൾ പുറത്തുവിട്ട് ഗ്ലോബൽ ഒടിടി

മലയാളിക്ക് ഏറെ അഭിമാനമേകുന്ന വിജയം കുറിച്ച ചിത്രമാണ് മോഹൻലാൽ – ജീത്തു ജോസഫ് കൂട്ടുകെട്ടിൽ ഒരുങ്ങിയ ദൃശ്യം. തീയറ്ററുകളും ബോക്‌സോഫീസും റെക്കോർഡുകളും കീഴടക്കിയ ചിത്രത്തിന്റെ രണ്ടാം ഭാഗമായ ദൃശ്യം 2 ആമസോൺ പ്രൈമിലാണ് റിലീസിന് എത്തിയത്. പാൻ ഇന്ത്യ തലത്തിൽ കൈയ്യടി നേടിയ ദൃശ്യം 2 മലയാള സിനിമക്ക് ഇപ്പോൾ ഒരു ആഗോള മാർക്കറ്റ് സൃഷ്ടിച്ചിരിക്കുകയാണ്. റെക്കോർഡ് തുകക്കാണ് ആമസോൺ ദൃശ്യം 2 സ്വന്തമാക്കിയതെന്ന് റിപ്പോർട്ടുകൾ ഉണ്ടായിരുന്നുവെങ്കിലും അത് എത്ര രൂപയ്ക്കാണ് എന്ന് അണിയറപ്രവർത്തകർ വെളിപ്പെടുത്തിയിരുന്നില്ല.

ഒടിടി പ്ലാറ്റ്‌ഫോമുകളെ കുറിച്ചുള്ള വാര്‍ത്തകളും വിവരങ്ങളും പങ്കുവയ്ക്കുകയും സര്‍വേകള്‍ നടത്തുകയും ചെയ്യുന്ന ലെറ്റ്സ് ഒടിടി ഗ്ലോബല്‍ എന്ന പേജ് ഈ തുകയെ കുറിച്ചുള്ള വിവരങ്ങള്‍ പുറത്തുവിട്ടിരിക്കുന്നു. 30 കോടി രൂപക്കാണ് ചിത്രം ആമസോൺ കരസ്ഥമാക്കിയത് എന്നാണ് അവർ ട്വീറ്റ് ചെയ്‌തിരിക്കുന്നത്‌. സൽമാൻ ഖാൻ നായകനാകുന്ന രാധെയാണ് ഒടിടിയിലൂടെ റിലീസിനെത്തുന്ന അടുത്ത വമ്പൻ ചിത്രം. ഏകദേശം 230 കോടി രൂപയ്ക്കാണ് ചിത്രത്തിന്റെ സംപ്രേക്ഷണാവകാശം സീ സ്റ്റുഡിയോസ് സ്വന്തമാക്കിയത്. മമ്മൂക്ക നായകനായ ദി പ്രീസ്റ്റും കഴിഞ്ഞ ദിവസം ആമസോൺ പ്രൈം വഴി റിലീസിന് എത്തിയിരുന്നു. മമ്മൂട്ടി ചിത്രം വൺ ഏപ്രിൽ 27ന് നെറ്റ്ഫ്ലിക്സിലൂടെ റിലീസിനെത്തുന്നുണ്ട്.