സ്റ്റീഫൻ നെടുമ്പള്ളിയായി ചിരഞ്ജീവി: ‘ഗോഡ്ഫാദർ’ ഫസ്റ്റ് ലുക്ക് എത്തി; മോഹൻലാലിന് പകരമാകില്ലെന്ന് ആരാധകർ

മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്ത ‘ലൂസിഫർ’ സിനിമയുടെ തെലുങ്ക് റീമേക്ക് ‘ഗോഡ്ഫാദർ’ ഫസ്റ്റ് ലുക്ക് പോസ്റ്റർ എത്തി. ചിത്രത്തിൽ സ്റ്റീഫൻ നെടുമ്പള്ളിയായി ചിരഞ്ജവിയാണ് എത്തുന്നത്. ചിരഞ്ജീവിയുടെ ഇൻട്രോ സീൻ ആണ് അണിയറപ്രവർത്തകർ റിലീസ് ചെയ്തത്. ചിരഞ്ജീവിയെ നായകനാക്കി തെലുങ്കിൽ ‘ഗോഡ്ഫാദർ’ ഒരുക്കുന്നത് തമിഴിലെ സൂപ്പർഹിറ്റ് സംവിധായകൻ മോഹൻരാജയാണ്.

മലയാളത്തിൽ മഞ്ജു വാര്യർ അവതരിപ്പിച്ച പ്രിയദർശിനി എന്ന കഥാപാത്രത്തെ തെലുങ്കിൽ നയൻതാരയാണ് അവതരിപ്പിക്കുന്നത്. എസ് തമൻ ആണ് സംഗീതസംവിധാനം. പൃഥ്വിരാജ് അവതരിപ്പിച്ച സയീദ് മസൂദ് എന്ന ഗാങ്സ്റ്റർ കഥാപാത്രത്തിന്റെ റോളിൽ സൽമാൻ ഖാൻ ആയിരിക്കും എത്തുക. ഈ കഥാപാത്രത്തെ ചില മാറ്റങ്ങളോടെ ആയിരിക്കും അവതരിപ്പിക്കുക. ചിരഞ്ജീവിയുടെ സ്റ്റീഫൻ നെടുമ്പള്ളിയുടെ ഭൂതകാലം മലയാളത്തിലേതിൽ നിന്ന് വ്യത്യസ്തമായിരിക്കും എന്നും റിപ്പോർട്ടുകളുണ്ട്.

മലയാളത്തിൽ മാസ് പൊളിറ്റിക്കൽ ത്രില്ലർ ആയിരുന്നെങ്കിൽ തെലുങ്കിൽ റൊമാന്റിക് ട്രാക്കിലൂടെയും സ്റ്റീഫൻ സഞ്ചരിക്കും എന്നാണ് റിപ്പോർട്ടുകൾ. ഖുറേഷി അബ്രാം എന്ന ഡോൺ ആയി ഇന്ത്യയ്ക്ക് പുറത്തും സ്റ്റീഫൻ നെടുമ്പള്ളി എന്ന രാഷ്ട്രീയക്കാരനായി കേരളത്തിലും വിലസുന്ന നായകനെയാണ് മോഹൻലാൽ അവതരിപ്പിച്ചത്. ചിത്രത്തിൽ സത്യദേവ് കഞ്ചണ ഒരു പ്രധാനവേഷത്തിൽ എത്തുന്നുണ്ട്. പുരി ജഗന്നാഥ്, നാസർ, ഹരീഷ് ഉത്തമൻ, സച്ചിൻ ഖഡേക്കർ എന്നിവരാണ് മറ്റ് പ്രധാന താരങ്ങൾ. . ഛായാഗ്രഹണം – നിരവ് ഷാ, എഡിറ്റിങ് – ശ്രീകർ പ്രസാദ്. കൊനിഡേല പ്രൊഡക്ഷൻ കമ്പനിയും മെഗാ സൂപ്പർ ഗുഡ് ഫിലിംസും ചേർന്നാണ് ചിത്രം നിർമിക്കുന്നത്.