ഫാൻസി നമ്പർ വേണ്ടായെന്ന് വെച്ച് ജനങ്ങളെ സേവിക്കുന്നത് നാടകമാണ്;പൃഥ്വിരാജിനെ വിമർശിച്ച് ഹരീഷ് പേരടി

കേരള ജനത മറ്റൊരു പ്രളയദുരന്തത്തെ കൂടി നേരിട്ടുകൊണ്ടിരിക്കുകയാണ്. ഇൗ അവസരത്തിൽ ദുരിതമനുഭവിക്കുന്നവർക്ക് ആശ്വാസമേകാൻ സിനിമാതാരങ്ങളും ഏറെ സജീവമാണ്. നടനും സംവിധായകനുമായ പൃഥ്വിരാജ് പുതിയതായി വാങ്ങിയ റേഞ്ച് റോവറിന് ഫാന്‍സി നമ്പര്‍ ഒഴിവാക്കി ആ പണം പ്രളയ ദുരിതാശ്വാസത്തിന് നൽകാൻ തീരുമാനിച്ചിരുന്നു. അദ്ദേഹത്തിന്റെ ആ തീരുമാനം ഏറെ പ്രശംസിക്കപ്പെട്ടിരുന്നു എങ്കിലും ഇപ്പോൾ അദ്ദേഹത്തിനെതിരെ വിമർശനവുമായി രംഗത്തെത്തിയിരിക്കുകയാണ് ഹരീഷ് പേരടി. ഫേസ്ബുക്ക് പോസ്റ്റിലൂടെയാണ് അദ്ദേഹം തന്റെ വിമർശനം അറിയിച്ചത്. പൃഥ്വിരാജിന്റെ ഈ നീക്കം വെറും നാടകം ആണെന്നാണ് ഹരീഷിന്റെ വാദം.

ഫാൻസി നമ്പറിന്റെ പണം മുഴുവൻ കിട്ടുന്നത് സർക്കാരിന് ആണെന്നും ആ കാറിന്റെ പണം മുഴുവൻ ലഭിക്കുന്നത് ഒരു സ്വകാര്യ കമ്പനിക്കാണെന്നും ഹരീഷ് പറയുന്നു. നാടകം കണ്ടതുകൊണ്ട് മാത്രം താൻ പ്രതികരിച്ചത് ആണെന്നും എന്തെങ്കിലും ഒന്ന് ഒഴിവാക്കിയിട്ട് മാത്രമെ എനിക്ക് ജനങ്ങളെ സേവിക്കാന്‍ സാധിക്കുകയുള്ളു എന്ന അത്ര കടുത്ത ദാരിദ്യം ഉണ്ടെങ്കില്‍ ഒന്നും ചെയ്യാതിരിക്കുന്നതാണ് നല്ലത് എന്നും അദ്ദേഹം പൃഥ്വിരാജിനോട് പറയുന്നു.

ഫേസ്ബുക്ക് പോസ്റ്റ് ചുവടെ :

ഫാൻസി നമ്പറിന്റെ പണം മുഴുവൻ സർക്കാറിനാണ് കിട്ടുന്നത് .. ആ കാറിന്റെ പണം മുഴുവൻ ഏതോ സ്വകാര്യ കമ്പനിക്കാണ്. ഏതാണ് ഒഴിവാക്കണ്ടേത്? രണ്ടും നടത്തിയെടുത്താലും ആർക്കും ഒരു കുഴപ്പവുമില്ല… നാടകം കണ്ടതുകൊണ്ട് അഭിപ്രായം പറഞതാണ്.. എന്തെങ്കിലും ഒന്ന് ഒഴിവാക്കിയിട്ട് മാത്രമെ എനിക്ക് ജനങ്ങളെ സേവിക്കാൻ സാധിക്കുകയുള്ളു എന്ന അത്ര കടുത്ത ദാരിദ്യം മുണ്ടെങ്കിൽ ഒന്നും ചെയ്യാതിരിക്കുന്നതാണ് നല്ലത്…Happy New Year…