മങ്ങാട്ടച്ഛനെ സ്വീകരിച്ചതിൽ സന്തോഷം; പ്രിയൻ സാറിനോട് നന്ദി പറയാൻ വാക്കുകളില്ലെന്ന് ഹരീഷ് പേരടി

‘മരക്കാർ – അറബിക്കടലിന്റെ സിംഹം’ തിയറ്ററുകളിൽ വിജയകരമായി പ്രദർശനം തുടരുകയാണ്. ചിത്രത്തിൽ മങ്ങാട്ടച്ഛൻ എന്ന കഥാപാത്രമായി എത്തിയത് ഹരീഷ് പേരടി ആയിരുന്നു. ഇന്ന് പുലർച്ചെ തിയറ്ററിൽ സിനിമ കാണാൻ ഹരീഷ് പേരടിയും എത്തിയിരുന്നു. ഇങ്ങനെ ഒരു കഥാപാത്രം തനിക്കു തന്നെ പ്രിയദർശന് നന്ദി പറയുകയാണെന്ന് ഹരീഷ് പേരടി ഫേസ്ബുക്കിൽ പങ്കുവെച്ച് കുറിപ്പിൽ പറഞ്ഞു.

‘മങ്ങാട്ടച്ഛനെ നിങ്ങൾ സ്വീകരിച്ചു എന്നറിയുന്നതിൽ നിറഞ്ഞ സന്തോഷം…ഇങ്ങിനെ ഒരു കഥാപാത്രം എനിക്കുതന്ന പ്രിയൻസാറിനോട് നന്ദി പറയാൻ വാക്കുകളില്ല…എന്നെ തേടിയെത്തിയ നല്ല വാക്കുകളിൽ മഹാനടൻ ലാലേട്ടന്റെ വാക്കുകൾ ഇങ്ങിനെ.. “Pranamam. You have done a great job.. Love and prayers.”…ഇത് എന്നിലെ നടന് കൂടുതൽ ശക്തി തരുന്നു..Thanku ലാലേട്ടാ’ – മരക്കാറിലെ ഹരീഷ് പേരടിയുടെ കഥാപാത്രത്തിന്റെ ഫോട്ടോ പങ്കുവെച്ചാണ് അദ്ദേഹം ഇങ്ങനെ കുറിച്ചത്.

നേരത്തെയും മരക്കാർ സിനിമയെക്കുറിച്ച് സിനിമയിൽ അഭിനയിച്ചതിനെക്കുറിച്ചും വാചാലനായി ഹരീഷ് പേരടി രംഗത്ത് എത്തിയിരുന്നു. മരക്കാർ തനിക്ക് സിനിമ മാത്രമല്ലെന്നും അഭിനയജീവിതത്തിലെ ഫിലിം ഇൻസ്റ്റിറ്റ്യൂട് ആണെന്നും ആയിരുന്നു ഹരീഷ് കുറിച്ചത്. കുറച്ചു ദിവസങ്ങൾക്കു മുമ്പ് മരക്കാർ സിനിമ റിലീസ് ആകുന്നതുമായി ബന്ധപ്പെട്ട് സംവിധായകൻ പ്രിയദർശൻ അയച്ച ഒരു സന്ദേശം പങ്കുവെച്ച് കൊണ്ടായിരുന്നു അന്ന് ഹരീഷ് കുറിപ്പ് പങ്കുവെച്ചത്. മരക്കാറിൽ ജോലി ചെയ്തതിന് കിട്ടിയ പണമൊക്കെ ചിലവായി പോയെന്നും പക്ഷേ ഈ വലിയ കലാകാരന്റെ വാക്കുകൾ തന്റെ ജീവിതകാല സമ്പാദ്യമാണെന്നും ആയിരുന്നു ഹരീഷ് പേരടി കുറിച്ചത്.