‘ജീവിതം ഏതു പ്രായത്തിലും ആഘോഷിക്കാനുള്ളതാണ്’; ആ വൈറല്‍ ഫോട്ടോ ഷൂട്ടിനു പിന്നിലെ കഥ ഇങ്ങനെ

സോഷ്യല്‍ മീഡിയയില്‍ വൈറലാണ് എലത്തൂര്‍, ചെട്ടികുളം, കണ്ണംവള്ളിപറമ്പ് ‘ഹരികൃഷ്ണ’യില്‍ 65-കാരനായ ഹരിദാസന്റേയും 58-കാരിയായ കൃഷ്ണവേണിയുടേയും ഫോട്ടോഷൂട്ട്.

ചെട്ടികുളം ബസാര്‍ ബീച്ചിലായിരുന്നു ഫോട്ടോ ഷൂട്ട്. ചട്ടയും മുണ്ടും ഉടുത്ത് കൃഷ്ണവേണിയും അതിന് മാച്ചാകുന്ന മുണ്ടും ബനിയനും ന്യൂജന്‍ ഷൂവും അണിഞ്ഞ് ഹരിദാസനും. ഫോട്ടോഷൂട്ടൊക്കെ കഴിഞ്ഞ് ഫോട്ടോകള്‍ അയച്ചുകൊടുത്തപ്പോഴാണ് മക്കളും മരുമക്കളുമൊക്കെ വിവരമറിഞ്ഞത്. എന്തായാലും മക്കളായ അമിതയും അഞ്ജലിയും മരുമക്കളായ വരുണ്‍രാജും ബിബിന്‍ സുകുമാരനും ഇരുവര്‍ക്കും കട്ട സപ്പോര്‍ട്ടായിരുന്നു.

ഒറ്റപ്പെടലിന്റെ വിരസതയകറ്റാന്‍ ഒരു ഫോട്ടോ ഷൂട്ടായാലോ എന്ന ആശയം മുന്നോട്ട് വയ്ക്കുന്നത് കൃഷ്ണവേണിയാണ്. ഒട്ടും മടിക്കാതെ ഹരിദാസന്‍ സമ്മതം മൂളിയതോടെ പിന്നെ ഒന്നും ആലോചിച്ചില്ല ബന്ധുകൂടിയായ ഫോട്ടോഗ്രാഫര്‍ രാകേഷിനെ വിളിച്ചു കാര്യം പറഞ്ഞു. പിന്നെ കാണുന്നത് ദമ്പതികളുടെ ഫോട്ടോ ഷൂട്ട് സമൂഹ മാധ്യമങ്ങള്‍ ഏറ്റെടുക്കുന്നതാണ് .

”മക്കള്‍ക്കൊരു സര്‍പ്രൈസ് കൊടുക്കണം എന്നേ ആദ്യം കരുതിയിരുന്നുള്ളൂ. ജീവിതം അങ്ങനെ വെറുതെ ജീവിച്ചു തീര്‍ക്കാനുള്ളതല്ല എന്ന സന്ദേശം നല്‍കാനാണുദ്ദേശിച്ചത്. നമ്മുടെ നാട്ടില്‍ കല്ല്യാണം കഴിഞ്ഞ് കുട്ടികളെ വളര്‍ത്തി പിന്നെ അവരുടെ കുട്ടികളെയും നോക്കികഴിഞ്ഞാല്‍ അടുത്തത് മരണം വരെ എങ്ങനെയെങ്കിലും ജീവിക്കുക എന്ന കാഴ്ചപ്പാടാണ്. അതല്ല ജീവിതം ഏത് പ്രായത്തിലും ആസ്വദിക്കാനുള്ളതാണ് എന്നാണ് ഈ ഫോട്ടോ ഷൂട്ടിലൂടെ ഞങ്ങള്‍ പറയാന്‍ ശ്രമിച്ചത്”- കൃഷ്ണവേണി പറയുന്നു.

ഷിപ്പിങ്ങ് കോര്‍പ്പറേഷന്‍ ഓഫ് ഇന്ത്യയില്‍ നിന്ന് വിരമിച്ച ഉദ്യോഗസ്ഥനാണ് ഹരിദാസന്‍. കൃഷ്ണവേണി വീട്ടമ്മയും. രണ്ട് മക്കളും കുടുംബത്തോടൊപ്പം ദുബായില്‍. വര്‍ഷത്തില്‍ നാലു തവണയെങ്കിലും ദുബായില്‍ പോയി കുറേ ദിവസം താമസിച്ച് തിരിച്ചുവരുന്നതായിരുന്നു കോവിഡിനു മുമ്പുള്ള ഈ ദമ്പതികളുടെ ജീവിതം. കോവിഡ് കാരണം എല്ലാം നിലച്ചതോടെ വല്ലാത്ത മടുപ്പ് തോന്നി. അങ്ങനെയിരിക്കുമ്പോഴാണ് ഒരു ഫോട്ടോ ഷൂട്ട് നടത്തിയാലോ എന്ന് ചിന്തിച്ചത്- കൃഷ്ണവേണി പറയുന്നു. ഡ്രസ്സും ആശയവുമെല്ലാം പറഞ്ഞു കൊടുത്തു. രാകേഷ് അതുപോലെ ചെയ്തുതന്നു.

കള്ളുഷാപ്പിന്റെ ഗ്രാഫിക്സ് പശ്ചാത്തലമാക്കിയതിനെ വിമര്‍ശിച്ചവരുമുണ്ട്. എന്നാല്‍ അതൊക്കെ ഫോട്ടോകള്‍ക്ക് രസം പകരാന്‍ ഉപയോഗിച്ചതിനപ്പുറത്തേക്ക് ചിന്തിക്കേണ്ട ആവശ്യമില്ലെന്നും ദമ്പതികള്‍ പറഞ്ഞു. പോസിറ്റീവ് ചിന്തകളെ മാത്രം ചേര്‍ത്തു പിടിച്ചു മുന്നോട്ട് നീങ്ങാനാണ് ഹരിദാസന്റേയും കൃഷ്ണവേണിയുടേയും തീരുമാനം.