തലൈവരുടെ ‘ജയിലർ’നു മുമ്പേ ധ്യാൻ ശ്രീനിവാസൻ ‘ജയിലർ’ ആകും; ഫസ്റ്റ് ലുക്ക് പോസ്റ്റർ പുറത്ത്

യുവനടൻ ധ്യാൻ ശ്രീനിവാസൻ നായകനാകുന്നു പുതിയ ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്ത്. ‘ജയിലർ’ എന്നാണ് ചിത്രത്തിന്റെ പേര്. ചിത്രത്തിൽ ‘ജയിലർ’ ആയാണ് ധ്യാൻ ശ്രീനിവാസൻ എത്തുന്നത്. സക്കിർ മഠത്തിൽ ആണ് ചിത്രം സംവിധാനം ചെയ്യുന്നത്. എൻ കെ മൊഹമ്മദ് ആണ് ചിത്രം നിർമിക്കുന്നത്. സോഷ്യൽ മീഡിയയിലൂടെ ധ്യാൻ ശ്രീനിവാസൻ തന്നെയാണ് പുതിയ ചിത്രത്തിന്റെ വിശേഷങ്ങൾ അറിയിച്ചത്. അതേസമയം, രസകരമായ കമന്റുകളാണ് പുതിയ സിനിമവിശേഷം പങ്കുവെച്ച ധ്യാനിന്റെ സോഷ്യൽ മീഡിയ പോസ്റ്റിനു ലഭിച്ചത്.

രജനികാന്തിനെ നായകനാക്കി നെൽസൺ സംവിധാനം ചെയ്യുന്ന പുതിയ ചിത്രത്തിന്റെ പേരും ‘ജയിലർ’ എന്നാണ്. സിനിമയുടെ ടൈറ്റിൽ പോസ്റ്റർ ജൂൺ 17ന് ആയിരുന്നു പുറത്തിറങ്ങിയത്. അതുകൊണ്ടു തന്നെ ധ്യാനിന്റെ പുതിയ ചിത്രത്തിന്റെ പേര് കേട്ടപ്പോൾ ആരാധകർക്ക് തലൈവരുടെ ‘ജയിലർ’ ആണ് മനസിലേക്ക് ഓടിയെത്തിയത്. ‘രജനി പടത്തിനു മുൻപേ.. Waah’, ‘തലൈവർ പടത്തിൽ ധ്യാൻ നായകൻ… മാസ്സ്’, ‘എന്തോന്നാടെ ഇത് രണ്ട് ജയിലറാ?’, ‘രജിനികാന്ത് എന്ത് പറഞ്ഞു’, ‘വന്ന് വന്ന് രജനിയുടെ കൂടെയും അഭിനയിച്ചു അല്ലേ…മാസ്സ്’ ഇങ്ങനെ പോകുന്നു കമന്റുകൾ. അതേസമയം, പുതിയ സിനിമ വരുന്ന സാഹചര്യത്തിൽ പുതിയ ഇന്റർവ്യൂ കാണാലോ എന്ന സന്തോഷത്തിലാണ് മറ്റ് ചില ആരാധകർ.

ധ്യാൻ ശ്രീനിവാസൻ തിരക്കഥ ഒരുക്കിയ പ്രകാശൻ പറക്കട്ടെ മികച്ച പ്രതികരണം നേടി തിയറ്ററുകളിൽ പ്രദർശനം തുടരുകയാണ്. ഇതിനിടയിലാണ് പുതിയ സിനിമയുടെ പ്രഖ്യാപനവുമായി താരം എത്തിയിരിക്കുന്നത്. അതേസമയം, രജിനികാന്തിന്റെ 169 ആമത്തെ ചിത്രമാണ് ജയിലർ. ബീസ്റ്റിന് ശേഷം നെൽസൺ സംവിധാനം ചെയ്യുന്ന ചിത്രമാണ് ഇത്. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിക്കുന്നത്.