ഹൃദയം കീഴടക്കി ‘ഹൃദയം’; ‘കിടു മൂവി’ കണ്ടിറങ്ങിയവർ ഒറ്റ സ്വരത്തിൽ പറയുന്നു

പ്രണവ് മോഹൻലാൽ, കല്യണി പ്രിയദർശൻ, ദർശന രാജേന്ദ്രൻ എന്നിവരെ നായകരാക്കി വിനീത് ശ്രീനിവാസൻ സംവിധാനം ചെയ്ത ‘ഹൃദയം’ തിയറ്ററുകളിൽ റിലീസ് ചെയ്തിരിക്കുകയാണ്. കോവിഡ് പ്രതിസന്ധിക്ക് ഇടയിലും മികച്ച പ്രതികരണമാണ് ചിത്രത്തിന് ലഭിച്ചിരിക്കുന്നത്. സിനിമ കണ്ടിറങ്ങിയവർ ഒറ്റ സ്വരത്തിൽ പടം ‘സൂപ്പർ’ എന്നാണ് അഭിപ്രായപ്പെട്ടത്. ‘ഹൃദയം’ ഹൃദയം കീഴടക്കിയെന്നും കിടു മൂവിയാണെന്നും ചിത്രം കണ്ടിറങ്ങിയവർ പറഞ്ഞു.

ചിത്രത്തിൽ പ്രണവ് മോഹൻലാൽ മികച്ച അഭിനയമാണ് കാഴ്ച വെച്ചിരിക്കുന്നതെന്നും പ്രണവ് ആരാധകർക്ക് അഭിമാനിക്കാമെന്നുമാണ് ഒരു പ്രേക്ഷകൻ അഭിപ്രായപ്പെട്ടത്. കേരളത്തിൽ ഏകദേശം 450 ന് മുകളിൽ സ്ക്രീനുകളിലാണ് ഹൃദയം റിലീസ് ചെയ്തത്. താരപുത്രൻമാരാൽ സമ്പന്നമായ സിനിമ കൂടുയാണ് വിനീത് ശ്രീനിവാസൻ സംവിധാനം ചെയ്ത ഹൃദയം. മോഹൻലാൽ – പ്രിയദർശൻ – ശ്രീനിവാസൻ കൂട്ടുകെട്ട് ഒരു കാലത്ത് മലയാളികൾക്ക് അത്രമേൽ പ്രിയപ്പെട്ടതായിരുന്നു. ഹൃദയത്തിലൂടെ അടുത്ത തലമുറ ഒന്നിച്ച് എത്തി എന്ന പ്രത്യേകതയും ഉണ്ട്. ശ്രീനിവാസന്റെ മകൻ വിനീത് ശ്രീനിവാസൻ സംവിധാനം ചെയ്യുന്ന ചിത്രത്തിൽ പ്രിയദർശന്റെ മകൾ കല്യാണി പ്രിയദർശൻ, മോഹൻലാലിന്റെ മകൻ പ്രണവ് മോഹൻലാൽ എന്നിവരും ഒന്നിച്ചെത്തുന്നു. ഒരുപാട് വർഷങ്ങളുടെ ഇടവേളയ്ക്കു ശേഷമാണു മെരിലാൻഡ് എന്ന പ്രശസ്ത ബാനറിൽ ഒരു സിനിമ വരുന്നത് എന്ന പ്രത്യേകതയുമുണ്ട്.

സോഷ്യൽ മീഡിയയിലും ഹൃദയം സിനിമയെക്കുറിച്ച് മികച്ച അഭിപ്രായങ്ങളാണ് ‘ഹൃദയം’ സിനിമയെക്കുറിച്ച് നിറയുന്നത്. സംവിധായകൻ എന്ന നിലയിൽ വിനീത് ശ്രീനിവാസന്റെ മികച്ച ചിത്രവും അഭിനേതാവ് എന്ന നിലയിൽ പ്രണവ് മോഹൻലാലിന്റെ ഏറ്റവും മികച്ച ചിത്രവുമാണ് ‘ഹൃദയം’ എന്ന് സോഷ്യൽ മീഡിയയിൽ നിരൂപകർ കുറിച്ചു. ‘സിനിമയുടെ പേര് പോലെ തന്നെ ഹൃദയം കൊണ്ട് കാണേണ്ടതും ഹൃദയത്തിലേക് കേറുന്നന്നതുമായ ഒരു വിനീത് ശ്രീനിവാസൻ മാജിക്‌’ എന്നാണ് ഒരു പ്രേക്ഷകൻ സിനിമയെ വിശേഷിപ്പിച്ചത്.
‘ചലച്ചിത്രസംവിധാനത്തിന്റെ മർമ്മമറിയുന്ന ഒരച്ഛന്റെ മകൻ, അഭിനയകലയുടെ മർമ്മമറിയുന്ന ഒരച്ഛന്റെ മകന് നൽകുന്ന പുതിയ തുടക്കം.’ എന്നാണ് മറ്റൊരു പ്രേക്ഷകൻ ഹൃദയം സിനിമയെ വിശേഷിപ്പിച്ചത്.