വ്യക്തിപരമായ കാരണങ്ങളാല്‍ വിവാഹം നടന്നില്ല, അമ്മ ആഗ്രഹം പൂര്‍ത്തിയാക്കാതെ മടങ്ങി : ഇടവേള ബാബു

കലയ്ക്ക് കണക്ക് പറയരുത് എന്ന് പഠിപ്പിച്ച അമ്മയെ ഓര്‍ത്തെടുത്ത് മലയാളത്തിന്റെ പ്രിയ താരം ഇടവേള ബാബു. ആഗസ്റ്റ് 26 ന് ആയിരുന്നു ആകസ്മികമായി താരത്തിന്റെ അമ്മയുടെ വിയോഗവാര്‍ത്ത പുറത്തുവന്നിരുന്നത്. തലേദിവസം ജന്മദിനം ആഘോഷിച്ച് അപ്രതീക്ഷിതമായി മരണപ്പെട്ട അമ്മയെ കുറിച്ചാണ് താരമിപ്പോള്‍ അഭിമുഖത്തിലൂടെ സംസാരിക്കുന്നത്.

അമ്മയുടെ പിറന്നാള്‍ ദിനത്തില്‍ മലയാളത്തിലെ പ്രിയ താരം മോഹന്‍ലാല്‍ അടക്കം നിരവധി താരങ്ങള്‍ വിളിച്ച് ആശംസകള്‍ നല്‍കിയതും താരം ഓര്‍മ്മിക്കുന്നു. പിറ്റേ ദിവസം ആയിരുന്നു അപ്രതീക്ഷമായി അമ്മ ഈ ലോകത്തോട് വിട പറഞ്ഞത്. മലയാളസിനിമയില്‍ ചെറുതും വലുതുമായ നിരവധി കഥാപാത്രങ്ങളെ അവതരിപ്പിച്ച ഇടവേളബാബു അവിവാഹിതനാണ്.അവിവാഹിതനായി താന്‍ ജീവിക്കുന്നു എന്നതായിരുന്നു അമ്മയുടെ ഏറ്റവും വലിയ വിഷമം എന്നും താരം പറയുന്നു. അമ്മജീവിച്ചിരിക്കുന്ന കാലത്ത് ആശങ്കപ്പെട്ടതും താന്‍ അവിവാഹിതനായി ജീവിക്കുന്നു എന്നതിനെക്കുറിച്ച് ആയിരുന്നു.

തലേദിവസം പേരക്കുട്ടികള്‍ക്കും മക്കള്‍ക്കുമൊപ്പം കേക്ക് മുറിച്ച് ആഘോഷിച്ച ശേഷമാണ് അമ്മ കിടന്നുറങ്ങിയത്. പുലര്‍ച്ചെ ഒരു മണിയോടെ ടോയ്ലറ്റില്‍ പോയി തിരിച്ചുവരുമ്പോള്‍ കട്ടിലില്‍ കുഴഞ്ഞുവീഴുകയായിരുന്നു ശബ്ദം കേട്ട് സഹോദരങ്ങള്‍ ഓടിയെത്തി, 10 മിനിറ്റിനുള്ളില്‍ ആശുപത്രിയില്‍ എത്തിച്ചെങ്കിലും രക്ഷിക്കാന്‍ സാധിച്ചില്ല. ഹൃദയാഘാതത്തെ തുടര്‍ന്നാണ് മരണം സംഭവിച്ചത് എന്നും താരം പറഞ്ഞു.