ലംബോർഗിനി വാങ്ങാൻ കാശില്ല; ഒരെണ്ണം സ്വന്തമായി നിർമിച്ചു; അനസിന് അഭിനന്ദനവുമായി കമ്പനി..! തന്റെ ലംബോർഗിനി പൃഥ്വിരാജിനെ കാണിക്കുവാൻ ആഗ്രഹം

ലംബോർഗിനി ഒക്കെ മിഡിൽ ക്ലാസ് വിഭാഗത്തിൽ പെട്ട ഒട്ടുമിക്ക ഭാരതീയരുടെയും സ്വപ്നങ്ങളിൽ മാത്രം സ്വന്തമാക്കുന്ന ഒരു വാഹനമാണ്. അത് ഒരെണ്ണം സ്വന്തമാക്കുവാൻ ഏവർക്കും ആഗ്രഹമുണ്ടാകും. പക്ഷേ അതിനുള്ള പണമില്ലെങ്കിലോ? ഒരെണ്ണം അങ്ങ് സ്വയം ഉണ്ടാക്കുക. അങ്ങനെയാണ് ഇടുക്കിക്കാരൻ അനസ് ഒരു ലംബോർഗിനി സ്വയം നിർമിച്ചത്. വിഡിയോ സമൂഹമാധ്യമങ്ങളിൽ തരംഗമായതോടെ ബെംഗളൂരുവിലെ ഓഫിസിൽ നിന്നും ബന്ധപ്പെടുകയും ശ്രമത്തെ അഭിനന്ദിക്കുയും ചെയ്തെന്ന് അനസ് പറഞ്ഞു. സത്യം പറഞ്ഞാൽ പൃഥ്വിരാജിന്റെ ലംബോർഗിനിയാണ് എന്റെ പ്രചോദനം. അദ്ദേഹത്തിന്റെ വാഹനം കണ്ടാണ് ഇത് നിർമിച്ചത്. എന്റെ ലംബോർഗിനി പൃഥ്വിരാജ് കണ്ടിരുന്നെങ്കിൽ എന്നൊരാഗ്രഹമുണ്ട്. അനസ് പറഞ്ഞു.

പതിനെട്ടു മാസം കൊണ്ടാണ് അനസ് വാഹനത്തിന്റെ പണി പൂർത്തിയാക്കിയത്. 110 സിസി ബൈക്കിന്റെ എൻജിൻ ഉപയോഗിച്ചാണു നിർമാണം. ഒറിജിനൽ ലംബോർഗിനിയുടേതു പോലെത്തന്നെയാണ് മറ്റു സൗകര്യങ്ങൾ. പഴയ ഫ്ലെക്സും പ്ലാസ്റ്റിക് വസ്തുക്കളും വരെ നിർമാണത്തിൽ ഉപയോഗിച്ചു.ഡിസ്ക് ബ്രേക്ക്, പവർ വിൻഡോ, സൺ റൂഫ്, മുന്നിലും പിന്നിലും ക്യാമറകൾ തുടങ്ങി ഒരു ആഡംബര വാഹനത്തിലെ സൗകര്യങ്ങളെല്ലാം അനസിന്റെ ‘ലംബോർഗിനിയിലുമുണ്ട്’. അര ലക്ഷം രൂപ കൂടി മുടക്കി ഇലക്ട്രിക് വാഹനമാക്കണമെന്നാണ് ആഗ്രഹം. ഒരിക്കൽ ആലുവയിലെ ഒരു യൂസ്ഡ് കാർ ഷോറൂമിൽ ലംബോർഗിനി പ്രതാപത്തോടെ നിൽക്കുന്നതു കണ്ടപ്പോൾ മുതലാണ് സ്വപ്നങ്ങളുടെ തുടക്കമെന്നും എംബിഎ ബിരുദധാരിയായ അനസ് പറയുന്നു.