പോസ്റ്ററിലെ നമ്പറിൽ വിളിക്കുമ്പോൾ ചെല്ലുന്നത് കലാസദൻ ഉല്ലാസിലേക്ക്;വേറിട്ട പ്രൊമോഷനുമായി രമേശ് പിഷാരടി

പലവിധ കോമഡി നമ്പറുകളിലൂടെ പ്രേക്ഷക ഹൃദയം കീഴടക്കിയ രമേഷ് പിഷാരടി സംവിധാനം ചെയ്യുന്ന മമ്മൂട്ടി ചിത്രമാണ് ഗാനഗന്ധർവ്വൻ. മിമിക്രി ആർട്ടിസ്റ്റ് എന്ന രീതിയിലും നടൻ എന്ന രീതിയിലും ഏറെ ആരാധകരുള്ള പിഷാരടി, സംവിധായകൻ വേഷമണിയുന്ന രണ്ടാമത്തെ ചിത്രമാണിത്. ജയറാം കേന്ദ്രകഥാപാത്രമായ പഞ്ചവർണ്ണതത്ത ആയിരുന്നു പിഷാരടിയുടെ സംവിധാനത്തിൽ ഒരുങ്ങിയ ആദ്യചിത്രം. രണ്ടാമത്തെ ചിത്രമായ ഗാനഗന്ധർവ്വന്റെ ഫസ്റ്റ് ലുക്ക് പോസ്റ്റർ ഇന്നലെ പുറത്ത് വരികയുണ്ടായി. ചിത്രത്തിൽ ഗാനമേളകളിൽ പാട്ടുപാടുന്ന ഒരു ഗായകൻ ആയിട്ടാണ് മമ്മൂട്ടി എത്തുന്നത്. അതിനാൽ തന്നെ ഫസ്റ്റ് ലുക്ക് പോസ്റ്റർ സാധാ ചിത്രങ്ങളുടെ പോസ്റ്ററിൽ നിന്നും വളരെ വ്യത്യസ്തമായ രീതിയിലാണ് ഒരുക്കിയിരിക്കുന്നത്.

ഗാനമേള ട്രൂപ്പിന്റെ പ്രോഗ്രാം പോസ്റ്റിനോട് ഏറെ സാമ്യമുള്ള ഈ ഫസ്റ്റ് ലുക്ക് പോസ്റ്റർ ഏറെ ജനശ്രദ്ധ നേടി. കലാസദൻ ഉല്ലാസ് ആയിട്ടാണ് മമ്മൂട്ടി ചിത്രത്തിൽ എത്തുന്നത്. പോസ്റ്റിന് അടിയിൽ ബുക്കിങ്ങിനായി കൊടുത്തിരിക്കുന്ന നമ്പർ ട്രൂകോളർ സെർച്ച് ചെയ്തവർ ഒന്നടങ്കം ഞെട്ടിയിട്ടുണ്ട്. ചിത്രത്തിലെ മമ്മൂട്ടി കഥാപാത്രത്തിന്റെ പേരായ കലാ സദൻ ഉല്ലാസ് എന്നാണ് നമ്പർ സേവ് ചെയ്തിരിക്കുന്നത്. ഗാനഗന്ധർവന്റെ അണിയറപ്രവർത്തകരുടെ ബ്രില്ലിയന്സ് ഇവിടെ തെളിഞ്ഞു കാണാൻ സാധിക്കും. വിളിക്കുന്നവർക്ക് വളരെ നല്ല ഒരു മറുപടിയും അണിയറപ്രവർത്തകർ ഒരുക്കിയിട്ടുണ്ട്. കലാസദൻ ഉല്ലാസിനെ തേടി പിടിച്ചവർക്ക് നന്ദി എന്നു തുടങ്ങുന്ന ഒരു മറുപടിയാണത്.