തിരക്കഥ ഇതുവരെ സിനിമയാക്കാൻ ആയില്ല;ഒടുവിൽ പെങ്ങളുടെ വള വിറ്റ് ട്രെയ്​ലർ ഷൂട്ട് ചെയ്തു !

സിനിമയെടുക്കാൻ കാശില്ലാത്തതിന്റെ പേരിൽ ചിത്രത്തിന്റെ ട്രെയിലർ മാത്രം ഷൂട്ട് ചെയ്ത് പുറത്തിറക്കിയിരിക്കുകയാണ് ജയേഷ് മോഹനെന്ന കോതമംഗലം സ്വദേശി. അദ്ദേഹം പോസ്റ്റ് ചെയ്ത ‘ചിലർ’ എന്ന ടൈറ്റിൽ ഉള്ള ട്രെയിലർ ഏറെ ജനശ്രദ്ധ നേടി. തന്റെ തിരക്കഥയുമായി വർഷങ്ങളോളം നിരവധി വാതിലുകൾ മുട്ടിയതിനുശേഷമാണ് ഈ ഒരു സാഹസത്തിനു മുതിർന്നത് എന്ന് ജയേഷ് പറയുന്നു. രണ്ടുവർഷത്തോളമായി അദ്ദേഹം ഈ തിരക്കഥയുമായി നിരവധി ആളുകളെ സമീപിക്കുന്നു. പക്ഷേ അദ്ദേഹത്തിന്റെ തിരക്കഥ ആർക്കും ഉൾക്കൊള്ളാനാവുന്നില്ലായിരുന്നു.

താൻ ഈ കഥയിലൂടെ എന്താണ് ചിന്തിക്കുന്നത് എന്ന് ആളുകളെ മനസ്സിലാക്കിക്കുവാൻ വേണ്ടിയാണ് അദ്ദേഹം ഈ ട്രെയിലർ ഷൂട്ട് ചെയ്തത്. ട്രെയിലർ ഷൂട്ട് ചെയ്യാൻ പണമില്ലാതെ പെങ്ങളുടെ വള വിറ്റാണ് അദ്ദേഹം അത് ഷൂട്ട് ചെയ്തത്. കൂട്ടുകാരന്റെ ക്യാമറയിൽ ഒരുക്കിയ ട്രെയിലറിൽ അഭിനയിച്ചവർ എല്ലാവരും തന്നെ പരിചയക്കാർ ആയിരുന്നു. അങ്ങനെ ട്രെയിലറുമായി വീണ്ടും ആളുകളെ കണ്ടു തുടങ്ങി. അവിടെയും രക്ഷയില്ലാതെ വന്നപ്പോൾ ആണ് അദ്ദേഹം സോഷ്യൽ മീഡിയയിലൂടെ ട്രെയിലർ പുറത്തിറക്കുന്നതിനെ പറ്റി ചിന്തിച്ചത്. ഇപ്പോൾ ട്രെയിലർ ഏറെ ജനശ്രദ്ധ നേടുകയും നിരവധി ആളുകൾ അദ്ദേഹത്തെ വിളിക്കുകയും സിനിമയെപ്പറ്റി സംസാരിക്കാം എന്നു പറയുകയും ചെയ്തു. ഇതിലൂടെ ഏതെങ്കിലും ഒരു നല്ല നിർമ്മാതാവിനെ ലഭിക്കുമെന്ന പ്രതീക്ഷയിലാണ് ജയേഷ്.