ലൂസിഫറിലൂടെ പൃഥ്വിരാജ് നിറവേറ്റുന്നത് നടക്കാതെ പോയ സുകുമാരന്റെ സ്വപ്‌നം…! കൂട്ടിന് സഹോദരൻ ഇന്ദ്രജിത്തും

എഴുപതുകളുടെ അവസാനത്തിലും എൺപതുകളുടെ തുടക്കത്തിലും ജയൻ, എം ജി സോമൻ എന്നിവർക്കൊപ്പം മലയാളത്തിൽ സൂപ്പർസ്റ്റാർ പദവി അലങ്കരിച്ചിരുന്ന നടനാണ് സുകുമാരൻ. ക്യാരക്ടർ വേഷങ്ങളിലൂടെയും വില്ലൻ വേഷങ്ങളിലൂടെയും പ്രേക്ഷകമനം കീഴടക്കിയ സുകുമാരൻ പടയണി, ഇരകൾ തുടങ്ങിയ ചിത്രങ്ങളിലൂടെ നിർമ്മാതാവായും തിളങ്ങി. തന്റെ നാല്പത്തിയൊമ്പതാം വയസിൽ 1997 ജൂൺ 16ന് ഹൃദയാഘാതത്തിന്റെ രൂപത്തിൽ ഈ ലോകത്തോട് വിട പറയുമ്പോൾ ഒരു സംവിധായകൻ ആകണമെന്ന സ്വപ്‌നം ബാക്കി വെച്ചിട്ടാണ് സുകുമാരൻ യാത്രയായത്.

വർഷങ്ങൾക്കിപ്പുറം തനിക്ക് സാധിക്കാതെ പോയ ആ സ്വപ്‌നം മകൻ പൃഥ്വിരാജ് സഫലമാക്കുമ്പോൾ അത് കാണാൻ സുകുമാരൻ ജീവനോടെ ഇല്ലല്ലോ എന്നതാണ് ഏറെ വേദനിപ്പിക്കുന്ന ഒരു യാഥാർഥ്യം. മോഹൻലാലിനെ നായകനാക്കി ലൂസിഫർ എന്ന തന്റെ ആദ്യ സംവിധാന സംരംഭം ഒരുക്കുമ്പോൾ പൃഥ്വിരാജിന്റെ മനസ്സിലും അച്ഛന്റെ ആ സ്വപ്‌നം നിറവേറ്റാൻ കഴിഞ്ഞൊരു സന്തോഷമുണ്ടാകും. ലൂസിഫറിന്റെ സെൻസറിങ്ങിന്റെ തലേന്ന് അച്ഛന്റെ സാന്നിധ്യത്തിൽ അമ്മയുടെ അനുഗ്രഹം വാങ്ങാൻ പൃഥ്വിരാജ് ചെന്നിരുന്നു. അച്ഛന്റെ സ്വപ്‌നം നിറവേറ്റുമ്പോൾ പൃഥ്വിരാജിനൊപ്പം ഇന്ദ്രജിത്തും ആ സിനിമയിൽ ഭാഗമാകുന്നുവെന്നത് ആ അച്ഛന്റെ ആത്മാവിന് ഏറെ സന്തോഷം പകരുന്നുണ്ടാകും.