ജയിലിൽ പരിചയപ്പെട്ട സഹതടവുകാരുടെ കുടുംബത്തിന് ആര്യൻ ഖാന്റെ സഹായവാഗ്ദാനം

മുംബൈ: സഹതടവുകാരുടെ മോചനത്തിന് സഹായവാഗ്ദാനം നൽകി ഷാരുഖ് ഖാന്റെ മകൻ ആര്യൻ ഖാൻ. ആർതർ റോഡ് ജയിലിലെ ജയിൽ അധികൃതരാണ് ഇക്കാര്യം അറിയിച്ചത്. ജയിൽവാസത്തിനിടെ പരിചയപ്പെട്ട ഏതാനും തടവുകാരുടെ കുടുംബത്തിന്റെ അവസ്ഥ അറിഞ്ഞ ആര്യൻ ഖാൻ അവർക്ക് നിയമസഹായവും സാമ്പത്തികസഹായവും വാഗ്ദാനം ചെയ്തെന്നാണ് റിപ്പോർട്ടുകൾ. കഴിഞ്ഞദിവസം ആര്യൻ ഖാന് ജാമ്യം ലഭിച്ചിരുന്നു. 21 ദിവസത്തെ ജയിൽ വാസത്തിനു ശേഷമാണ് ആര്യൻ ഖാന് ജാമ്യം ലഭിച്ചത്.

ആഢംബര കപ്പലില്‍ നാര്‍ക്കോട്ടിക് കണ്‍ട്രോള്‍ ബ്യൂറോ നടത്തിയ റെയ്ഡിലാണ് ഒക്ടോബര്‍ ആദ്യയാഴ്ച ആര്യന്‍ ഖാനെ അറസ്റ്റ് ചെയ്തത്. അറസ്റ്റിനെ തുടർന്ന് മുംബൈയിലെ ആർതർ റോഡിലെ ജയിലിൽ റിമാൻഡിൽ ആയിരുന്നു. രണ്ടു തവണ ആര്യന് കോടതി ജാമ്യം നിഷേധിച്ചിരുന്നു. അതേസമയം, ആര്യനിൽ നിന്ന് മയക്കുമരുന്ന് കണ്ടെത്താൻ എൻ സി ബിക്ക് ആയിട്ടില്ലെന്ന് ജാമ്യാപേക്ഷയിൽ അഭിഭാഷകർ ചൂണ്ടിക്കാട്ടിയിരുന്നു. 21 ദിവസത്തെ ജയിൽവാസത്തിനു ശേഷം കഴിഞ്ഞദിവസമാണ് ആര്യൻ ഖാന് ജാമ്യം ലഭിച്ചത്.

പതിനാല് കർശന ജാമ്യവ്യവസ്ഥകളോടെയാണ് ആര്യൻ ഖാന് ജാമ്യം അനുവദിച്ചത്. എൻ സി ബി ഓഫീസിൽ എല്ലാ വെള്ളിയാഴ്ചയും ഹാജരാകണം. പാസ്പോർട്ട് കോടതിയിൽ സമർപ്പിക്കണം. മുൻകൂർ അനുമതിയില്ലാതെ രാജ്യം വിടാൻ പാടില്ല. കൂടാതെ, കേസ് സംബന്ധിച്ച് മാധ്യമങ്ങളിൽ അനാവശ്യ പ്രസ്താവനകൾ നടത്താൻ പാടില്ല. മുംബൈ വിട്ട് പുറത്തു പോകേണ്ടി വന്നാൽ അന്വേഷണ ഉദ്യോഗസ്ഥനെ വിവരമറിയിക്കണം. ഇതോടൊപ്പം ഒരു ലക്ഷം രൂപ കെട്ടി വയ്ക്കണം. ഏതെങ്കിലും വ്യവസ്ഥകൾ ലംഘിക്കപ്പെട്ടാൽ ജാമ്യം റദ്ദാക്കാൻ എൻസിബിക്ക് കോടതിയെ സമീപിക്കാം.