ഓസ് ലെർ ഇതുവരെ ആഗോളതലത്തിൽ നേടിയത് 25 കോടി, ബോക്സ് ഓഫീസ് കളക്ഷനുകൾ വ്യക്തമാക്കുന്നത്

നടൻ ജയറാമിനെ നായകനാക്കി മിഥുൻ മാനുവൽ തോമസ് സംവിധാനം ചെയ്ത ചിത്രം അബ്രഹാം ഓസ് ലെർ തിയറ്ററുകളിൽ വൻ വിജയം സ്വന്തമാക്കി മുന്നേറുകയാണ്. ഈ വർഷത്തിലെ ആദ്യത്തെ തിയറ്റർ ബ്ലോക്ക് ബസ്റ്റർ ആയിരിക്കുകയാണ് ചിത്രം. ജനുവരി 11ന് റിലീസ് ചെയ്ത ചിത്രം അഞ്ചു ദിവസം പിന്നിടുമ്പോൾ ആഗോളതലത്തിൽ 25 കോടിക്ക് അടുത്താണ് നേടിയിരിക്കുന്നത്. ജയറാമിനൊപ്പം മമ്മൂട്ടി കൂടി എത്തിയപ്പോൾ ഓസ് ലെർ വൻവിജയമാണ് സ്വന്തമാക്കിയത്.

ഇന്ത്യയിൽ നിന്ന് മാത്രം 12.55 കോടി സ്വന്തമാക്കിയ ഓസ് ലെർ ഓവർസീസ് ആയി നേടിയത് 10 കോടിക്ക് മേലെയാണ്. അഞ്ചു ദിവസം കൊണ്ട് 25 കോടിയിലേക്ക് എത്തിയിരിക്കുകയാണ് ഓസ് ലെർ. ഒരു ഇടവേളയ്ക്ക് ശേഷം ജയറാം സിനിമയുടെ തകർപ്പൻ മുന്നേറ്റമാണ് തിയറ്ററുകളിൽ കാണാൻ കഴിയുന്നത്. കേരളത്തിനൊപ്പം ഗൾഫ് രാജ്യങ്ങളിലും മികച്ച കളക്ഷനാണ് ചിത്രത്തിന് ലഭിക്കുന്നത്. വിവിധ ട്രേഡ് ഗ്രൂപ്പുകളുടെയും അനലിസ്റ്റുകളുടെയും റിപ്പോർട്ടിന്റെ അടിസ്ഥാനത്തിൽ ആദ്യദിനം ഓസ് ലെർ നേടിയത് ഏകദേശം ആറുകോടി രൂപ അടുപ്പിച്ചാണ്. ജനുവരി 11ന് ആയിരുന്നു ഓസ് ലെർ തിയറ്ററുകളിലേക്ക് എത്തിയത്. അ‌ഞ്ചാം പാതിരയ്ക്ക് ശേഷം മിഥുൻ മാനുവൽ തോമസിന്റെ സംവിധാനത്തിൽ ഒരുങ്ങിയ ചിത്രത്തിന്റെ തിരക്കഥ ഒരുക്കിയത് ഡോ. രൺധീർ കൃഷ്ണയാണ്.

ദിലീഷ് പോത്തൻ, അ‍ർജുൻ അശോകൻ, അനശ്വര രാജൻ, ജഗദീഷ്, സായ് കുമാർ തുടങ്ങി ഒരു വലിയ താരനിര തന്നെയുണ്ട് ചിത്രത്തിൽ. ഇര്‍ഷാദ് എം ഹസനും മിഥുന്‍ മാനുവല്‍ തോമസും ചേര്‍ന്ന് നിര്‍മ്മിക്കുന്ന ചിത്രത്തിന്‍റെ ഛായാ​ഗ്രഹണം നന്‍പകല്‍ നേരത്ത് മയക്കമുള്‍പ്പെടെയുള്ള ചിത്രങ്ങളുടെ ക്യാമറ കൈകാര്യം ചെയ്ത തേനി ഈശ്വര്‍ ആണ്. സംഗീതം മിഥുന്‍ മുകുന്ദന്‍, എഡിറ്റിംഗ് ഷമീര്‍ മുഹമ്മദ്, പ്രൊഡക്ഷന്‍ ഡിസൈന്‍ ഗോകുല്‍ ദാസ്.