“8 മാസത്തെ ക്വാറൻറ്റൈനും 7 മാസത്തെ തൊഴിലില്ലായ്‌മയും” പുതിയ ലുക്കിൽ ചിത്രം പങ്കുവെച്ച് ജയറാം

കൊറോണ വൈറസ് വ്യാപനത്തെ തുടർന്ന് ലോക്ക് ഡൗൺ പ്രഖ്യാപിച്ചപ്പോൾ നിശ്ചലമായ ഒരു മേഖലയാണ് സിനിമ മേഖല. സിനിമയുടെ ഷൂട്ടിങ് എല്ലാം നിർത്തി വെച്ചതിനാൽ താരങ്ങളും അണിയറ പ്രവർത്തകരും ദിവസവേതന തൊഴിലാളികളും എല്ലാം ഇപ്പോൾ വീട്ടിൽ തന്നെയാണ്. സിനിമാ മേഖലയിലെ എല്ലാ സംഘടനകളും ചേര്‍ന്ന് കൂട്ടായ ചര്‍ച്ച നടത്തിയതിന് ശേഷം മാത്രമേ ചലച്ചിത്ര മേഖല പുനരാരംഭിക്കാനാകൂ എന്നും കൊവിഡ് വ്യാപനം സൃഷ്ടിച്ച സ്തംഭനാവസ്ഥ നേരിടാന്‍ മുന്‍നിര താരങ്ങള്‍ അമ്പത് ശതമാനമെങ്കിലും പ്രതിഫലം കുറയ്ക്കണമെന്നും താരങ്ങള്‍ക്ക് പുറമേ മുന്‍നിര ടെക്‌നീഷ്യന്‍സും പ്രതിഫലത്തില്‍ ഭീമമായ കുറവ് വരുത്തണമെന്നും നിര്‍മ്മാതാവും ഫിലിം പ്രൊഡ്യൂസേഴ്‌സ് അസോസിയേഷന്‍ ഭാരവാഹിയുമായ ജി. സുരേഷ് കുമാർ പറഞ്ഞിരുന്നു.

തിയേറ്ററുകൾ തുറന്നിട്ടില്ല എങ്കിലും ഷൂട്ടിങ് ചെറിയതോതിൽ ഇപ്പോൾ ആരംഭിച്ചിട്ടുണ്ട്. സിനിമാ നടന്മാർക്കും നടിമാർക്കും ഇത് തൊഴിലില്ലായ്മ കാലമാണ്. എന്നും ഷൂട്ട് ഉണ്ടായിരുന്നവർ പോലും ഇപ്പോൾ വീട്ടിലാണ്. നാളെ ഇനി തിയേറ്ററുകൾ തുറന്നാൽ പോലും സിനിമ മേഖല വീണ്ടും പഴയ സ്ഥിതിയിലേക്ക് ആകുമോ എന്ന സംശയം ഇവരുടെ ഉള്ളിലുണ്ട്. നടനായ ജയറാം ഇപ്പോൾ സോഷ്യൽ മീഡിയയിൽ പങ്കുവെച്ച ഒരു പോസ്റ്റാണ് തരംഗം സൃഷ്ടിക്കുന്നത്. തന്റെ ഒരു ചിത്രം പങ്കു വച്ചു കൊണ്ടാണ് ജയറാം കുറിപ്പ് ഇടുന്നത്.” 8 മാസത്തെ ക്വാറൻറ്റൈനും 7 മാസത്തെ തൊഴിലില്ലായ്‌മയും, ” എന്നാണ് ജയറാം കുറിച്ചത്. ലോക്ക് ആയതോടെ ചെന്നൈയിലെ വീട്ടിൽ തന്നെയാണ് അദ്ദേഹം ഉള്ളത്. അവിടെ പച്ചക്കറി തോട്ടം ഒരുക്കിയും അല്ലാത്ത സമയം വർക്കൗട്ട് ചെയ്തുമാണ് അദ്ദേഹം ചിലവഴിക്കുന്നത്.