റാം സിനിമയുടെ കഥ കേട്ടപ്പോൾ മമ്മൂട്ടിക്ക് തോന്നിയത്, തുറന്നുപറഞ്ഞ് ജീത്തു ജോസഫ്, മോഹൻലാൽ ഇന്റർനാഷണൽ ആകുമെന്ന് ആരാധകർ

മലയാളത്തിന്റെ പ്രിയനടൻ മോഹൻലാലിനെ നായകനാക്കി ജീത്തു ജോസഫ് ഒരുക്കുന്ന ചിത്രമാണ് റാം. റാം സിനിമയുടെ ചിത്രീകരണം പുരോഗമിക്കുകയാണ്. ‍ദൃശ്യം, ദൃശ്യം 2, ട്വൽത്ത് മാൻ എന്നീ സിനിമകൾക്ക് ശേഷം മോഹൻലാലും ജീത്തു ജോസഫും ഒരുമിക്കുന്ന ചിത്രം കൂടിയാണ് റാം. പകുതിയോളം ഷൂട്ടിംഗ് പൂർത്തിയായ ഈ ചിത്രത്തിന്റെ ബാക്കി ഷൂട്ടിംഗ് നവംബർ 15നു ശേഷം തുടങ്ങും. ജനുവരി പകുതി വരെയാണ് ചിത്രത്തിന്റെ ഷൂട്ടിംഗ് നടക്കുക.

ജനുവരിയിലെ ഷൂട്ടിംഗിനു ശേഷം 2023 ഏപ്രിലിൽ ബ്രിട്ടനിൽ വെച്ചു നടക്കുന്ന പത്തു ദിവസത്തെ ഷൂട്ടിംഗ് കൂടി പൂർത്തിയാകുമ്പോൾ റാം സിനിമയുടെ രണ്ടു ഭാഗങ്ങളും പൂർത്തിയാകും. ജീത്തു ജോസഫ് തന്നെയാണ് ചിത്രത്തിന്റെ തിരക്കഥയും രചിച്ചിരിക്കുന്നത്. കഴിഞ്ഞ ദിവസം ആയിരുന്നു ആസിഫ് അലിയെ നായകനാക്കി ജീത്തു ജോസഫ് ഒരുക്കിയ കൂമൻ സിനിമ റിലീസ് ആയത്. കൂമൻ സിനിമയുടെ പ്രചരണാർത്ഥം പോപ്പർ സ്റ്റോപ്പ് മലയാളത്തിന് നൽകിയ അഭിമുഖത്തിൽ ജീത്തു ജോസഫ് പറഞ്ഞ കാര്യമാണ് ഇപ്പോൾ വൈറലായിരിക്കുന്നത്.

റാം സിനിമയുടെ ലൊക്കേഷൻ അന്വേഷിച്ച് പോയപ്പോൾ അവിടെ മമ്മൂട്ടി സിനിമയുടെ ചിത്രീകരണം നടക്കുകയായിരുന്നു. അപ്പോൾ തന്നെ കണ്ട മമ്മൂക്ക റാം സിനിമയുടെ കഥ ചോദിച്ചെന്നും കഥ കേട്ട് കഴിഞ്ഞപ്പോൾ ‘അപ്പോൾ ഇന്റർനാഷണൽ ആണ് അല്ലേ’ എന്നായിരുന്നു മമ്മൂട്ടിയുടെ പ്രതികരണമെന്നും ജീത്തു ജോസഫ് പറഞ്ഞു. റാം സിനിമ നിർമിക്കുന്നത് അഭിഷേക് ഫിലിംസ് ആണ്. തൃഷ ആണ് ചിത്രത്തിൽ നായികയായി എത്തുന്നത്. വിഷ്ണു ശ്യം ആണ് ചിത്രത്തിന് സംഗീതം ഒരുക്കുന്നത്. ഇന്ദ്രജിത്, സംയുക്ത മേനോൻ, പ്രിയങ്ക നായർ, ആദിൽ ഹുസൈൻ, സുമൻ, ലിയോണ ലിഷോയ്, അനൂപ് മേനോൻ തുടങ്ങി ഒരു വലിയ താരനിരതന്നെ ഈ ചിത്രത്തിലുണ്ട്. വി എസ് വിനായക് ആണ് എഡിറ്റ് ചെയ്യുന്നത്. ക്യാമറ ചലിപ്പിക്കുന്നത് സതീഷ് കുറുപ്പ്.